RB細場照玩預告有驚喜
樂隊RubberBand（RB）時隔近兩年，再度舉行音樂會，雖然這次「降格」伊館，但四子直言細有細做，最重要樂迷聽得開心。音樂會規模麻雀雖小，但RB請來曾擔任天后王菲演唱會音樂總監的Terry Chan合作，誓要打造一個充滿驚喜的騷。
RubberBand將於11月初在伊館舉行兩場音樂會，上次開騷是2012年年底在紅館舉行，時隔近兩年後選在伊館開騷，他們表示不覺得有「降格」的感覺，成員泥鯭說：「我哋唔介意喺細場玩，甚至鍾意喺細場玩，所以唔覺得係一個落差，每個場都有佢嘅難度，大場係人多，但難度係你點樣令到最後嗰個位都感受到被娛樂，細場亦有其難度。所以唔好單純考慮個size，咩場地都有挑戰。」問到為何這次落腳伊館？泥鯭說：「個騷年頭決定搞，book場比較難，而伊館係一個我哋幾鍾意嘅場地，未有紅館前好多音樂盛事都喺伊館度搞，但我哋未過試。」
享受與樂迷互動
他們表示不論場地大細，最緊要可以樂在其中。問到怎樣的音樂會最令他們享受？四人直言最緊要樂迷聽得開心，成員阿偉說：「我哋有次去土耳其，去一個好似羅馬鬥獸場咁嘅劇場，我哋膽粗粗咁喺嗰度玩音樂，有啲crew幫我哋拉啲外國觀眾入場，啲觀眾得廿零人，佢哋聽唔明我哋唱乜，但又玩得好開心，好互動。」成員6號亦說：「呢個係一個交流，正如我哋出碟，歌迷可以畀番意見我哋，做音樂唔係閉門造車嘛，咁嘅話不如四個喺錄音室自high啦。」
孖星級監製合作
問到他們可會請嘉賓？阿偉表示請來一個重量級嘉賓：「今次音樂總監係第一次合作，佢叫Terry Chan，係一個好資深嘅星級監製，以前做王菲音樂會音樂總監。若歌手我哋覺得有啲位啱，可能都會搵。」6號指音樂會沒有特別主題，笑言樂迷入到場，在沒有任何期望下可能會有特別驚喜。
Makeup：Yen Lai
Hair：Mad ho@IL COLPO TST
Outfits：Denim ＆ Supply Ralph Lauren
場地：彌敦酒店
文：音樂組