小肥再開騷唔畀甩底
歌手小肥早前於澳門開騷，但因地點跟香港有一海之隔，不少朋友「放飛機」未有捧場，將在港開騷的他笑言今次一班朋友無藉口甩底，他又謂不會學其他歌手操到成身肌肉去開騷，擔心操到無力唱歌。
每個歌手於樂壇拚搏多年，均想踏上紅館開個唱，出名唱得的小肥同樣有個紅館夢，早前於澳門開騷的他將在8月底於香港開音樂會，小肥透露今次未有太大變化，跟主題、服裝、歌曲等跟澳門場大同小異，那為何要再搞？因他就是為行上紅館這個大舞台而鋪路。
拒變肌肉男
雖然小肥的香港音樂會睇落似翻做，但他坦言準備時亦有不少煩惱，他說︰「其實都有好多嘢要諗，例如監製嫌我啲歌唔夠，而且嘉賓方面，上次嚟唔到，今次會請，但上次嚟嘅又未必能夠請晒，所以依家諗起呢樣嘢非常頭痛。」他又指上次邀請不少朋友來澳門睇騷，但最後被「放飛機」，故笑言今次在香港舉行，朋友不會再有藉口臨時甩底，他笑說︰「10個朋友有6個放咗飛機，可能一海之隔佢哋過嚟有困難，但今次香港搞唔會再有呢個藉口啩？」
過往不少歌手開騷前除積極練歌，就是喪做gym操fit個body，但小肥直言不會刻意去減肥，笑指騷肌無佢份，他說︰「我會做運動練氣，但唔係想多舊肌肉，我身邊唔少大隻佬，並其實練到咁大隻未必有力，到時我唱歌無力咪弊？」