薛凱琪高呼愛男人

曾經跟余文樂傳過緋聞的王璐瑤日前接受本報專訪時，驚爆曾獲圈中一線女星狂溝，更直指該女星曾被一當紅男星拋棄而變攣，提示一出，即令人歸納出七位嫌疑女星，當中包括盛傳曾與房祖名拍拖而最近傳出同林二汶撻着的薛凱琪、與黃宗澤分手後即被發現跟同性友人酒後咀嘴的胡杏兒，以及跟鄭嘉穎掟煲後搵女友人療傷的佘詩曼。

全女班練舞

Fiona昨日為下月六至七日舉行的「adidas Presents Tonight Fiona Live 2014」練舞時，對於被指為「七女星」而當場O晒嘴，她強調：「邊個LuLu？我唔識，我唔會追女仔，我鍾意男仔o架！」至於另一嫌疑人物杏兒就以短訊回覆本報否認，並信誓旦旦強調：「我完全唔識佢，未見過佢，不作評論。」佘詩曼亦稱：「吓！咁搞笑！我唔識佢過喎！」而女主角LuLu就強調：「我只係想講自己感受，唔想影響到人，如果我想博宣傳不如開埋名啦！」

胡杏兒強調並不認識王璐瑤。

王璐瑤自爆獲一線女星力追，她重申並非博宣傳。

Fiona昨日又談到演唱會練舞導致腰骨痛，要看醫生食止痛藥，問到為何舞蹈員會清一色全女班？Fiona笑言：「個排舞室冇咁臭，同埋性感衫可以畀晒佢哋。」提到有指門票銷情麻麻，她澄清說：「本身都驚，但公司話唔係，而且有人話我張580蚊嘅飛炒到1,400蚊。」

文：音樂組