阿佘醉終甩拖 無緣戀Chilam

經典無綫劇《衝上雲霄》去年播放續集口碑甚佳，成功令飾演「Cool魔」的張智霖人氣高企，「Sam哥」吳鎮宇繼續俘虜萬千女士，無綫食髓知味投資電影版，據知最近已低調開拍，除吳鎮宇及Chilam外，更加入型男古天樂、視后佘詩曼及台灣女星郭采潔等，睇頭十足！

據知起初安排Chilam與阿佘演一對，但電力十足的阿佘屢與拍檔傳緋聞，14年前與Chilam拍攝劇集《十月初五的月光》時，緋聞傳得火熱，令Chilam太太靚靚緊張得親自監場，雖已事隔多年，但「電佘」威力未減，為免再生事端激親靚靚，無綫決定將Chilam改配郭采潔，阿佘則與古天樂有感情線。

醉酒的佘詩曼整個人放軟打斜行。

張智霖昨日與袁詠儀帶魔童家庭樂。

妝溶嘴傷

阿佘日前與《衝》片監製兼好友梁家樹到大坑飯局，未知是否傾談合作計劃，當晚阿佘非常盡興，開懷大酌至半夜12點才離開，已變醉貓的阿佘由梁家樹及食肆女高層攙扶步出，見阿佘臉紅紅妝已溶，嘴角見紅疑似受傷，眼神迷離更打斜行路，記者上前打招呼她亦零反應，最後要由代客泊車職員接載返寓所。

另邊廂，Chilam與靚靚昨日被發現在銅鑼灣超級市場掃貨，見他變身住家男人拿着一大袋戰利品，其後Chilam會合靚靚及兒子魔童，原來一家三口行街，靚靚發現記者即揞實兒子頭顱，魔童亦搞笑地配合從後攬實。

文：影視組

攝：追蹤組