羅霖突爆家暴 前夫反嘲：有嘢要宣傳？
前亞姐羅霖兩年多前宣布跟前夫劉坤銘分居辦離婚，但始終未有披露真正離婚原因。昨日羅霖出席有份投資的醫療集團開幕禮時，突然驚爆因家暴導致離婚，期間更一度嗚咽；另一邊廂，劉坤銘則反擊前妻經常以此博宣傳，強調二人再見不是朋友。
前亞姐羅霖與商人劉坤銘兩年多前宣布辦離婚，二人就贍養費及三名兒子的撫養權一度鬧不和，期間羅霖曾表示前夫不肯簽離婚書，又不肯跟她溝通，只透過律師聯絡，她又斥前夫不肯租屋給她，令她無力與三名兒子同住，暗指對方無情。
打招呼食檸檬
昨日她出席有份投資的醫療集團開幕禮，原本雀躍滿場飛招呼賓客，突然有感而發：「我好開心都好感觸，呢兩年嚟所做嘅，都用咗幾倍時間嚟做，所以依家有少少成績都好安樂。」說着眼泛淚光，令在場記者和賓客都感愕然，更一度哽咽抹淚，情緒激動大爆離婚真正原因：「其實分居時一直冇公布原因，係希望小朋友可以慢慢接受，至於真正原因係家暴！（發生喺你定小朋友身上？）喺我身上。（發生過幾多次？）一次。（當日情況係點？）我希望今後唔會再影響我啲小朋友，希望過自己新生活。（發生家暴後有冇報警？）冇，唔想嚇親小朋友。（第三者？）唔係。（錢銀關係？）都冇，今日係開心事，但突然好感觸。」
羅霖再三表示有人欲誤導真相，她不希望小朋友再受誤導說話影響，所以決定自爆遭遇家暴，事發時小朋友亦在場，聽到聲音更詢問何事。她又謂曾經想跟前夫好來好去，嘗試做回朋友，但對方態度決絕：「其實呢兩年（停頓五秒）嘗試同前夫做番朋友，見面打招呼，但佢冇咩理睬，我希望盡力照顧三個小朋友嘅心靈，我已經行出第一步，但對方都冇乜反應，仲一直誤導小朋友，好困擾我。」問到爆離婚原因會否擔心被告誹謗？她說：「係事實，我唔怕。（之後有冇陰影？）陰影一定有，因為未試過。（傷勢？）冇乜嘢，但無論傷勢大小，心靈都受到傷害。（覺唔覺得佢好暴躁或有暴力傾向？）唔想講佢嘅性格。」
「鍾意講由得佢」
另邊廂，劉坤銘接受電話訪問，對於前妻自爆家暴，他禮貌地說：「佢已經唔係第一次咁講，我唔想佢每次講乜嘢我都要回應，都咁耐啦，兩年喇，佢係咪又有嘢要宣傳？佢鍾意講乜由得佢啦！（究竟你有冇動過手？）呢樣嘢係佢講，你問番佢啦！（你唔否認？）我唔想再回應佢講嘅嘢，佢咁鍾意講，由得佢講啦，你哋問佢啦！」至於羅霖表示欲跟她保持朋友關係但遭拒絕，他聽罷即說：「我同佢冇需要有雙重身份，總之佢係三個小朋友嘅媽咪，我係三個小朋友嘅爹哋就得，唔需要有另外嘅身份同關係。」
而羅霖得悉前夫指她博宣傳就回應說：「佢鍾意點講就點講，冇所謂，我唔會用啲唔開心嘅事去宣傳。」
文：名人組