負傷陳家樂考電單車肥佬
英皇「新男神」陳家樂日前現身沙田駕駛學院，頭帶白色頭盔的他穿上12號「龜背」練習揸電單車，家樂不時兩頭望，留意路面情況。「學神」家樂直路上斜毫無難道，唯獨是在斜路練習「打8字」時有點狼狽，更數度差點失平衡，認真驚險！直至下午三時半左右，教車師傅指導家樂換上考試專用車正式考試，經過一朝的苦練，家樂成功在場內通過「打8字」考核，之後駛離學院考「路試」。
炒車撞壆
戰戰兢兢的家樂除下頭盔接過成績單，他直言：「Pass唔到，其實都練咗一年，上年八月拍戲角色要揸電單車，諗住學識可以拍劇時真揸，報咗先知要用咁多時間嚟學，可惜結果過唔到。」問是否拍拖影響？家樂笑言：「唔關事嘅。（緋聞女友衛詩雅有冇鼓勵你？）有，其實佢都想學，但佢報咗發現自己推唔郁架車。」講到考牌成功會否載詩雅幫她圓夢？家樂指詩雅很有可能是首位乘客，因她身形嬌小，家樂自爆：「其實我之前踩單車載人都炒過幾次車，有次拍戲炒車，搞到個女仔Pat Pat損晒。」
家樂離開學院後到灣仔睇跌打，跌打醫師為他的右腳浸藥酒再捽腳包紮，右腳包到似「糉」的家樂更搞笑地苦惱怎樣穿鞋。記者致電家樂問到睇跌打一事，他說：「其實臨考前想爭取時間練多啲，前一日喺學院練咗5、6個鐘，臨尾唔小心撞咗上壆夾親右腳舊患，結果考試時煞車控制得唔好。」他表示要休息一星期，亦會再報考希望能合格。
文：音樂組