城城收購藝術品 等升值
天王郭富城昨日到apm出席藝術活動，獲藝術大師Romero Britto替他畫人像素描。出名愛車的他除了收藏價值不菲的跑車外，原來近年也愛到世界各地博物館欣賞藝術品，漸漸有競投藝術品的興趣，其收藏品中有畫作及雕塑。雖然甚有升值潛力，但城城謂最重要是「買到鍾意嘅嘢。」
郭富城、混血模特兒Alice B.、「扒女」李依琳及女星袁嘉敏等昨日出席「apm狂歡9周年慶典 x Romero Britto『潮夏藝術起動』啟動禮」，城城獲殿堂級普普藝術大師Romero Britto即場畫肖像素描，這趟更是Romero首度畫亞洲巨星，城城則回禮送上親筆簽名DVD。問城城有否收藏藝術品？他直言：「呢兩年去過世界各地博物館，鍾意現代藝術，又有競投藝術品，收藏品有畫及雕塑，價值7位數，但最愛都係收藏車，自己唔識投資，試過投資房地產蝕錢，但最重要係買到鍾意嘅嘢嚟收藏。」
肖像畫擺床頭
城城更謂這次獲Romero畫肖像感到榮幸，期待完成後的作品，亦是今年最好的禮物：「佢都係睇我第一個印象嚟畫，大眼同樣子唔差。（幅畫會掛去邊？）自己房床頭，係無價寶。（到時婚照都畫出嚟擺？）諗到咁遠！（如藝術大師邀請你畫全裸會否答應？）佢係正面，畫親都係名人，睇中我係dancer同singer，見到我隻碟係pose王，個風格唔係嗰種，唔會。」提起舊愛熊黛林（Lynn），他一聽聞Lynn名字即表示不回應。
Alice B.有人追
同場的Alice B.性感現身，問她早前24歲生日如何慶祝？她透露在家與「結他男」看電影及食壽司，又有結他聽，更直言有人追：「佢好好，玩音樂，佢係香港人，做法律相關工作，不過唔想成日拍拖後又失戀，簡單啲好，將來嘅事冇人知。」
文：名人組