蘇永康30萬拍婚照 沙漠「驚」情
歌手蘇永康（蘇康）與未婚妻馮翠珊（Anita）將於年底拉埋天窗，鑑於Anita情迷拉斯維加斯，故蘇康特別拉大隊遠赴當地沙漠拍攝婚照，除豪擲逾30萬港元請來14位工作人員隨行，更租用荷里活化妝車，難怪婚照感覺「蘇」豪！但他直言在沙漠中遇上不少驚險事，令他難忘！
歌手蘇永康與未婚妻Anita將於12月2日假港島五星級酒店筵開50圍豪搞婚禮，蘇康對於近日被指為婚事諗「縮數」，指他除請狄波拉代訂酒席攞折頭外，又借公司資源帶Anita離港籌備婚事，令蘇康無名火起，因事實上蘇康為婚禮能盡善盡美，十分揼本！本月5日，蘇康趁與BIG FOUR到拉斯維加斯演出後，特別抽出10小時與未婚妻到當地沙漠及Bellagio酒店前的音樂噴水池拍攝「快閃」婚紗照於婚宴上分享幸福。
車轆陷沙一波幾折
據知兩個拍攝行程由蘇康自掏腰包，豪擲逾30萬港元聘請14名工作人員隨行，包括攝影師顏米羔，並租用兩架車，其中一架更是荷里活拍戲用的30呎長化妝車，連巨星畢彼特（Brad Pitt）及未婚妻安祖蓮娜祖莉（Angelina Jolie）也是捧場客，十分架勢！蘇康接受電話訪問時稱：「我女人想去啲特別嘅地方，佢好鍾意拉斯維加斯，咁啱我喺當地，不過佢行程好緊密，得10個鐘時間，所以我做完BIG FOUR演唱會就趕去影。」
蘇康為了拍攝晨曦效果，與未婚妻連夜趕路，坐2小時車程到拍攝地點。整個拍攝可謂一波幾折，除了無覺好瞓，又遇上「車禍」，化妝車轆陷入了鬆散沙丘之中，之後更在沙漠中迷路，幸最後都有驚無險到達目的地。蘇康為貫徹潮人風格，連拍攝婚照都別具一格，兩公婆捨棄傳統白色婚紗，穿上黑色禮服，更齊齊戴上蘇康招牌黑超，大玩型格路線，並在晨光中浪漫咀嘴。
GaGa御用保鏢護駕
蘇康坦言拍攝時太陽剛升起，熱到要不停抹汗，問到何解要如此辛苦？蘇康笑言：「因為我老婆屎忽痕。」他更踢爆未婚妻鬼主意多多：「佢有諗過喺沙漠鋪塊紗瞓喺度，我再壓上去，不過佢好驚蛇蟲鼠蟻，我就怕沙漠有蛇同蠍子，所以Ban咗。」
離開沙漠後，眾人移師到Bellagio酒店前的音樂噴水池拍攝，由於當地遊客眾多，故他們找來兩名美國天后Lady GaGa御用保鏢護駕，甚有荷里活巨星排場。
另外，蘇康昨日又與未婚妻孖公仔出巡，兩人到中環名店為婚禮購買靚衫，兩人表現合拍，不時有商有量，蘇康更除低黑超睇清楚細節位，一絲不苟。
文：音樂組
攝：追蹤組