黃凱芹張智霖拗手瓜
80年代「情歌王子」黃凱芹（Chris）三度重返香港樂壇，將於8月初推出製作費過百萬的HiFi發燒碟，全程起用「名牌」音樂製作人及錄音室，Chris再跟香港唱片公司合作，全因老闆承諾「支票任開」，超得寵之餘，「Neway Star一哥」張智霖（Chilam）終遇上強敵。
今年52歲的Chris相隔兩年，將於8月的HiFi展前推出發燒天碟《Kings Cross天王時期》，據知令Chris首肯在港再出碟，全因Neway Star大老闆薛濟傑親自力邀，更提出「製作費無極限」的條件，令他備受尊重。
巴閉「人頭咪」
日前Chris在長途電話中受訪時說：「其實我未見過薛生本人，但佢請咗位唱片高層嚟同我傾，我覺得錢都係其次，最令我心動係無論我有任何製作上嘅要求，公司都會答應，所以今次呢張發燒碟，要百萬起跳。」他已非首次錄HiFi碟，但今次感覺全不一樣，當中最難忘是：「監製喺香港專登『班』咗支Dummy Head Recording畀我錄音，呢支人頭咪好巴閉，會錄到更靚聲效果，但監製嚟加拿大時，支咪過唔到關，好在臨時喺加拿大搵到一支，我係首位用呢個咪錄音嘅華人歌手。」至於他所租用的Armoury Studios亦大有來頭，是Drake、Seal、Bon Jovi、Norah Jones等著名音樂人的御用錄音室。
回港行程緊密
說到音樂班底，均是曾獲格林美獎的頂級音樂家，得公司全力銀彈支持的Chris，難怪錄得好開心：「呢十首翻唱『四大天王』嘅歌，一定會有意想不到嘅效果。」
月尾Chris將返港宣傳，然後去廣州開演唱會，他說：「其實我好樂意配合香港嘅宣傳，如果反應好，會再推出第二輯，同計劃明年開演唱會。」Neway Star高層朱先生被問到Chris的加盟，是否跟Chilam爭「一哥」之位？朱先生說：「唔會，佢哋兩個各有唔同風格同fans層，Chris成張碟10首歌拍晒MV要過百萬埋單，但Chilam一首歌MV都50萬，好難比較。」
文：音樂組