高海寧愛坐電單車胸壓馬德鐘

藝人高海寧（高Ling）和馬德鐘昨日齊齊出席「Honda新車發布會」，即場為新車揭幕和車主大玩遊戲，場內氣氛高漲。高Ling以低胸紅色短裙上陣，大騷事業線及白滑長腿，她笑言從未想過考電單車牌，自己只做乘客：「咁樣就可以大條道理坐吖嘛，（唔怕胸壓司機影響揸車嗎？）唔會影響啦，做嘢拍戲坐過咋，私底下冇識人揸電單車，惟有睇下馬德鐘願唔願意車我啦。」

高Ling還大方透露如男士懂得駕駛電單車必定在心底加分：「因為我覺得揸住電單車飛馳好有型，（唔驚危險咩？）唔驚呀，我覺得好刺激同好好玩。」她續表示現忙於拍攝工作，還希望可盡快開拍自己於電影《賭城風雲2》的戲份：「我想快啲見到發哥，但我啲戲份全部喺香港取景，所以冇得同佢哋出埠拍，（唔去泰國探班？）我驚阻住佢哋做嘢，如果唔係我淨係去同發哥影張相就走都好呀！」

太太准買車

另馬德鐘則身穿皮褸型格現身，與大會主題襯到絕。他表示品牌的兩款新車非常合心意，並已獲得太太發咗買車「準可證」：「因為我一部電單車都冇，而且太太知道我係唔會飛車、精神同天氣唔好都唔會揸電單車嘅人，（太太坐過未？）咁又真係咁耐以嚟都未坐過喎！」他更十分支持囝囝考電單車牌：「我覺得揸電單車唔係一件危險嘅事，因為你唔係拎嚟飛o架嘛，同埋揸私家車唔會有自由奔放嘅感覺。」剛從澳洲度假回來的他續透露十年前曾在悉尼拍攝一輯電單車照片，更笑言今趟旅行被朋友力邀移民到當地。

文：名人組