Gisele冇眼睇 匿埋房依挹
巴西超模Gisele Bundchen已抵達巴西，準備在香港時間今日凌晨運送「大力神杯」到世界盃頒獎台，不過，向來高調力撐祖家的Gisele，昨日被影到無到場睇國家隊季軍戰之餘，更在酒店房內睇風景兼親熱，認真唔畀面！
雖然Gisele與美式足球球星老公Tom Brady已結婚5年多，但仍相當恩愛。昨日下午被狗仔隊影到，兩公婆懶理巴西隊在季軍戰被荷蘭狂數三粒，匿在下榻的里約熱內盧一酒店房內歎冷氣睇窗外風景！二人睇風景期間，情不自禁地親熱，咀嘴之餘，Tom更不時從後攬實老婆錫面珠。
而同日晚上，兩公婆約埋三五知己到酒店食晚餐。由於一眾傳媒老早收到風Gisele兩公婆會出現，所以蜂擁到場採訪。而5呎11吋高的Gisele最煞食的招牌長腿，原來早於92年已出現，Gisele日前在Instagram上載一張舊照證明。
見球王比利
而「世界盃女燈神」樂壇天后Rihanna在世界盃舉行期間，一直在美國睇直播，上周五已飛抵巴西等睇決賽。由於今次巴西睇波之旅是由百威啤酒公司邀請，所以Rihanna好識做，抵達1小時不夠就已在酒店房開啤酒在露台暢飲。此外，她亦上載啤酒照大賣廣告。翌日，Rihanna換上豹紋性感上衣外出，期間除與友人在沙灘玩水外，更與巴西球王比利見面。
世盃牽紅線
另方面，哥倫比亞天后Shakira與結他之神Carlos Santana等，將在世盃閉幕禮上表演。雖然男友球星碧基（Gerard Pique）所屬的西班牙隊老早就出局，不過第3度為世盃表演的Shakira在巴西受訪時，就表示多謝足球使其人生改變，更揚言永遠不會忘記在世盃上結識一生中的最愛（碧基）！Shakira與碧基於2010年，因宣傳世界盃主題曲而認識。至於被問到有否安慰出局的男友？Shakira笑言自有一套方法安慰男友。
文：外娛組