娜姐情史谷戲收禮揭小三
周秀娜昨日出席宣傳活動，與粉絲分享「分手遺物」。單身的娜姐直言性格絕情，分手後不會留住有關舊愛的物件，又自爆曾於男友送贈唇膏時得悉有小三，情路似乎相當坎坷。同場的王菀之則與男友愛得甜蜜，表示有問題發生時會懂得「加糖沖淡」，但又得戚謂：「不過暫時未苦過。」
周秀娜、王菀之及鄭丹瑞（阿旦）等昨日到屯門市廣場，出席新片《分手100次》宣傳，眾人在台上與粉絲玩遊戲及分享「分手遺物」。
呼籲伊健歸隊
娜姐與粉絲分享「分手遺物」後有感而發：「分手後我冇嘢會留低，梗係騰番啲位出嚟，等收新禮物啦。目前只有一樣嘢我會keep住，係一支唇膏，事關前度送畀我嗰時，我發現同一張單佢買咗兩支，即係仲有人要送啦。（陳偉成？）唔係，當時我好細個，呢次係好嘅警惕，教訓自己以後唔好咁容易信人。（有追求者了解中？）呢排忙宣傳，只係了解觀眾嘅情史。」娜姐又笑言呼籲忙拍戲而多次缺席宣傳活動的拍檔鄭伊健速速歸隊。
菀之以「愛情」調校雪糕咖啡，結果搞到「一pat嘢」，阿旦見狀不禁皺眉直言「好難食」，菀之卻自豪謂：「咖啡同雪糕溶為一體呀。」
阿旦友善苛刻
事後菀之受訪，笑言已習慣阿旦對她苛刻：「佢係友善地苛刻，就係因為呢份壓迫感，令我對佢嘅尊敬加深。佢第一日開工見到我，唔係講早晨，係笑我對住鏡頭就會慌。（咁佢仲用你？）我有過人之處嘛。」
談到「咖啡與雪糕溶為一體論」，問菀之與男友的關係是否一樣，她謂：「一半一半啦，都sweet嘅，苦咪加糖囉。（點加？）未知，暫時未苦過！」
文：影視組