Stephy生死時速險陪炒
歌手鄧麗欣（Stephy）凌晨時分經歷一場「生死時速」，在大埔汀角路遇上嚴重交通意外，肇事貨Van撞至翻轉爛如廢鐵，幸好她及時煞車才避過「炒埋一碟」。雖然避過一劫，但已嚇到失魂，Stephy男友方力申（Alex）得知女友遇險，即叮囑她要小心駕駛。
鄧麗欣（Stephy）昨日在微博上載車禍相，出事車輛撞至翻轉，嚴重損毀，還弄至滿地雜物和爛鐵，她報平安說：「剛剛目擊一場交通意外，就在我前面的一輛車，幸好我跟不貼，能及時煞車，出事車輛的司機也幸好沒有甚麼大礙。大家外出時一定要小心駕駛！」由於相片觸目驚心，網民不停追問Stephy身體可無礙。
雜物飛去對面線
昨日Stephy接受電話訪問時，透露凌晨獨自駕車回家，行經大埔汀角路時，遇上疑超速的貨Van，心知不妙的她即提高警覺，跟前車保持距離，其後見貨Van和鄰線的私家車相撞後再衝向石壆，她憶述：「部貨Van撞完散晒，啲泵把、雜物乜都飛晒出嚟，有啲仲飛咗去對面線，情況好恐怖。（有冇擊中你？）差啲，好在冇事，不過我好驚，第一次目擊咁近嘅車禍。」
Stephy曾落車欲幫肇事司機，但被撞的司機更快手，並幫忙報警，對方更着她留在安全的地方，見車禍司機可自行爬出車，她才放下心頭大石，又讚香港人見義勇為，不少司機主動落車清理現場怕再生意外，警車約半小時抵達，再開路才可安全回家。
小方叫小心駕駛
問Stephy遇事時可有致電Alex求助？她說：「成點幾兩點，唔想騷擾人，不過之後都有講畀佢聽，佢叫我小心駕駛。（會唔會叫男友做司機，唔敢再揸車？）又唔會，我揸車好穩陣，佢揸我仲驚。」
文：音樂組