率家人巴西睇決賽克勤三招保命
經過凌晨在巴西上演的「德阿大戰」後，今屆世界盃冠軍得主終於誕生！圈中頭號球迷李克勤早已帶同老婆盧淑儀、爸爸及外父抵當地見證世紀盛事，可惜巴西搶劫黨橫行兼有醉爆睇波團鬧事，克勤未出發先驚餐飽！肩負保護家人重任的他決定實施一系列「家族戒嚴令」，使出「宵禁、人牆、鎖袋」三招自保，在巴西逃亡式睇世「戒」盃！
由德國大戰阿根廷的世界盃冠軍賽今晨3時在巴西里約熱內盧馬拉簡拿球場舉行，歌手李克勤身為足球狂熱分子，當然早已飛抵巴西，在開賽前攜同老婆盧淑儀、父親及外父到達決賽球場「備戰」。但自開賽以來，很多不法分子吼準時機在鬧市持槍行劫，更有球迷在海灘公然被集體「老笠」，故「有老有妻」的克勤未出發先驚嚇，他接受本報獨家電話訪問時，直認在當地遇上醉酒球迷：「巴西球迷一啲問題都冇，反而係阿根廷球迷呢兩日喺街度叫囂，群情洶湧，有啲仲飲醉酒！有啲就冇乜錢，揸車喺好遠嚟，夜晚就直接瞓喺車度。」
自行宵禁拒消夜
為安全計，克勤索性下達「家族戒嚴令」，第一招就是「自行宵禁令」，入夜後全家須留在酒店內，他亦因此婉拒與同在當地的陳百祥（阿叻）外出飲酒消夜之邀，他說：「連叻哥請我哋飲酒都唔敢去，治安方面係有需要少少擔心。」而第二、三招就是「圍集體人牆」及「夾萬鎖財物」，克勤指在睇波時不能掉以輕心，錢財亦不可露眼：「我哋睇波入場大家都會手拉手，會盡量圍埋一齊，連個袋都唔會帶，鎖喺酒店最安全。」
此外，克勤一家前日跟隨無綫攝製隊到巴西里約熱內盧沙灘欣賞巴西對荷蘭的季軍戰，問他會否擔心在沙灘集體遇劫？克勤稱：「唔知有集體打劫，唔知好過知，眼見都係阿根廷球迷比較偏激，大致都幾和平，可能街上多咗好多警察，上空又有直升機盤旋監視住。」
陳貝兒教買手信
首次帶同爸爸及外父親睹世盃決賽的克勤自封是「三個小生去睇波」，笑言有強迫兩老穿上球衣及畫大花面，齊齊感染氣氛。他又稱獲主持陳貝兒做導遊，並教眾人在當地掃膠拖鞋做手信，他說：「H字頭嗰隻名牌拖鞋，香港買成幾舊水，呢度買港幣30幾蚊一對，大家即刻去掃貨。」
文：音樂組