周柏豪爛鞋故事 激勵考生自強
每年一度的中學文憑試還有幾天就放榜，歌手周柏豪、鄭俊弘（Fred）和何雁詩昨日齊出席電台活動，為一眾應屆考生打氣！三人分別獻唱新歌鼓勵學生，柏豪更與一眾小粉絲大合唱，令全場High爆。他及後分享當年會考放榜經歷，雖成績欠佳，但慶幸多番嘗試，終找到出路：「臨放榜嗰時真係緊張到爆晒瘡，加上當時屋企又發生好多事，爸爸公司又執笠，我試過為咗慳錢行路返學，行到對鞋爛晒，阿媽仲以為我着住皮鞋打波。」自此柏豪常問父母過得開不開心，幸而現時的他們都生活愉快。
膽固醇超標
柏豪又提到最近的身體檢查，身體響起「警報」：「膽固醇有啲踩界，要戒食膽固醇食品，其實我都有Keep住運動，可能係遺傳，不過都好嘅，有個警示要開始食少啲喇，前排緊張成日食嘢，都有少少肚腩。」
靠傾偈減壓
而同場的Fred就分享在加拿大讀書時亦有類似考試：「當時臨派成績前都好擔心，最大解決方法就係搵啲朋友一齊傾吓偈，最緊要係有朋友同家人嘅陪伴。」Fred又即席勉勵考生們無須過分擔心：「成績一定會好好，加油！Try your best！放榜係生命必經的階段，諗番起舊時同朋友去圖書館溫書，回憶會係好美好o架。」
文：音樂組