JW雨后惹蚊險仆直

歌手JW昨日為與蘇永康（蘇康）合唱新歌《性情中人》拍MV，由於蘇康未能配合檔期，JW先到上環樓梯街、四方街及太平山街等地取景拍攝，可是昨日上午一直下毛毛雨，她要冒雨拍幾場街景。

MV其中一幕講JW與蘇康在不同時空漫步樓梯，由於蘇康缺席，JW惟有靠幻想，將工作人員手上的喇叭當做蘇康。穿透視短裙的JW踩四吋高無踭鞋，在樓梯街走上走落，由於天雨路滑，她幾乎仆倒，一不留神可能會跌落百級樓梯，所以她不時捉實欄杆。期間JW雙腿被蚊狂叮，化妝師即為她噴蚊怕水。

化妝師為JW噴蚊怕水。

黎明對JW給予很大自由度。（資料圖片）

JW受訪時直言今次冒雨拍攝曾擔心跣親：「要着對咁高嘅鞋行樓梯有啲驚，好彩着慣咗，同埋我每次拍MV都會落雨，所以工作人員都知道要帶定遮。」問老闆黎明可有對新歌畀意見？她說：「佢未畀意見，因為佢忙緊套電影，今次畀好大自由度我哋，我喺劇情、服裝方面都有份參與意見。」

拒隨JM離巢

對於有傳JW不滿公司未有投放資源，而將跟Janice Man離巢？她否認說：「唔知報道點嚟，JM合約係完咗，我仲有幾年約，大家合作愉快，會同公司一齊努力。」

文：音樂組