DaDa爆蜜運冧掂打工仔
影星古天樂及陳靜（DaDa）昨晚出席新片慶功宴，如沐春風的DaDa自爆正在約會中，嗒晒糖的她笑言等了很久終出現心儀對象，對圈外的「打工仔新歡」有讚冇彈：「佢係好男仔，唔似有目的，又佢出奇地了解我！」
影星古天樂、陳靜、盛君、林家棟及曾國祥昨晚到九龍灣出席電影《Z風暴》慶功宴，慶祝新片開畫五日收五百多萬元，密實到場的DaDa笑言要「騎劫」老闆黃百鳴，希望對方出錢抽獎，若自己抽到也不介意加碼，希望大家開心。提到該片是她復出頭炮，對於成績不俗，她說：「開頭都好大壓力，拍拍吓又冇乜，可能係男人戲，努力做好自己一Part就得，之後生活同電影都會好好分配！」
思想好接近
問到其感情生活，DaDa突然自爆有拖拍！她表示正跟一名圈外男子約會，提起對方更忍不住冧笑，承認是其心儀對象：「初步一齊囉！有約食飯睇戲，希望再認識深啲。（金融才俊？）上班族，打工嘅，佢喺我心目中係好好男仔，唔似有目的，對我朋友都好好，初初都擔心我喺娛樂圈，但佢出奇地了解我，大家思想好近！（你做主動？）唔係啦！（有發展空間？）有，好耐冇心儀嘅人喇！」被取笑樣子嗒晒糖時，DaDa即大笑承認：「哈！少少啦！」
至於古仔最近忙於拍攝林嶺東執導電影《暴走迷城》，其替身拍攝一場被車撞戲份時受重傷，古仔直言感心痛：「我落機後收到消息，都有打畀導演了解，知道佢出咗深切治療部，暫時OK，但都要長時間休息。（自己多啲留意安全？）導演好謹慎，有安排替身，但想寫實啲，有時冇咩點度就埋位。（反映吓？）盡量啦！意外大家都唔想。」他表示該場戲其角色要被車撞再跳橋跳船，現已作出修改。
文：影視組