苟芸慧遭非禮爆喊
藝員苟芸慧與陳貝兒身在巴西直擊世界盃時接連被瘋狂球迷非禮，苟姑娘被智利球迷「狼吻」，陳貝兒則遭比利時狂迷「胸襲」。苟姑娘被非禮後爆喊，心情大受影響留下心理陰影，坦言對她打擊相當大。
苟芸慧日前直擊西班牙對智利的賽事並訪問當地球迷，期間她突然被智利狂迷「霸王硬咀」，苟姑娘與採訪隊也被突如其來的舉動嚇呆，未來得及反應該狂迷已經極速閃走。抱恙的苟姑娘憶述事件幾乎爆喊：「喺巴西拍嘢好多時都會畀球迷抱起、攬住、錫面都可接受，但係kiss就真係接受唔到，估唔到咁猖狂。當時個腦空白一片，大家都呆咗唔知點反應，自己好shock，成個人frozen咗咁，啲工作人員想幫我都幫唔到，自己惟有行開cool down，跟住巴西女導遊安慰我，叫我一定要發洩出嚟，嗰刻真係忍唔住爆喊，喊咗出嚟係舒服啲，今次始終係幾侵犯性，導遊都問我使唔使報警，但係唔想搞大件事阻礙拍攝。」事發後苟姑娘坦言留下陰影，隨後兩日拍攝時都不其然會想起此事，只好叫自己不要多想，專心拍攝。
陳貝兒被摸胸
拍檔陳貝兒近日採訪比利時對俄羅斯賽事時亦遭胸襲，陳貝兒說：「喺巴西瘋狂球迷真係周圍都係，畀人錫咗幾啖、攬腰、摸胸都有，啲球迷太過熱情，咁多人有身體接觸都冇辦法，我諗佢哋唔係有惡意，如果唔係我都嗌咗非禮，自己都冇hard feeling，老公都安慰我話可能佢哋未見過咁靚嘅中國人呢！」
至於鄧佩儀採訪烏拉圭賽事時，幾乎被一名烏拉圭球迷在鏡頭前從後偷吻，她說：「當時自己都唔察覺，可能佢係貪玩、想搶鏡，但係發現拍緊嘢就即刻停止。」張秀文平時孭住個大背囊護身，但也被一名大叔偷襲得手，她說：「佢手多多穿過背囊攬我條腰。」對此，無綫世界盃監製李漢源回應說：「已經叫佢哋首要係小心，佢哋身邊嘅工作人員個個好高大都可以保護到佢哋，已經叫佢哋盡量少去酒吧或者複雜地方採訪。」
文：影視組