黃宇詩認細咪 冇膽做生招牌

自嘲「細咪一族」的黃宇詩有信心在頭一年回本，但笑言不敢做生招牌。

黃宇詩與曾志偉合資的內衣店昨日於上環隆重開幕，其母親華娃緊張撐場，而一班志偉好友張慧儀、江欣燕、黎芷珊、趙學而等都有出席。宇詩在席間宣布志偉都是股東之一，志偉更當場講笑謂：「黃霑生前叫我睇住佢個女，以為喺TVB睇住佢，原來佢唔鍾意咁細嘅地方，我淨係簽個名，佢應承我會上市、賺大錢。」

宇詩透露志偉投資了六位數字於店舖me Me&ME上，二人合共投資七位數字，坦言有信心頭一年可回本，問她為何找曾志偉合股時，她謂：「早幾年同佢去日本做獎門人，佢都覺得內衣有得做，咪一齊搞囉！」 問會否自己親身上陣做代言人時，宇詩笑言：「唔會，自己冇胸，係細咪一族，係都搵其他靚女，後生女先多人鍾意。」

黃宇詩獲母親華娃撐場，她更透露志偉為其內衣店投資了六位數字。	江欣燕力撐江希文是好媽媽，並指不清楚對方的家事。	趙學而自認微波，冇quali做內衣模特兒。

趙學而冇quali

為黃宇詩撐場的趙學而被問會到否替黃宇詩做內衣模特兒時，她笑謂：「我未有quali，做唔到，自己係微波。」 同場的江欣燕被問到妹妹江希文被指逼走奶奶，返港進駐胡家時，她坦言有見過妹妹，指對方跟丈夫（胡漢清）一齊住，現時以湊女為樂，江欣燕坦言：「佢哋屋企嘢我唔太清楚，見佢兩個開心就得，（妹妹為家庭唔開心？）唔會，佢係好好嘅媽媽，好賢良淑德，（佢同奶奶關係唔好？）唔會，佢唔係攻心計的人，總之佢唔係同奶奶一齊住。」

文：影視組