Rosanne血拼全家輪住湊B
已為人妻的2R家姐黄婉君（Rosanne）日前舉家到中環濕平，fit爆嘅Rosanne見到減價就連仔都唔理，掉低個仔畀屋企人睇住，幾個大人輪流服侍，囝囝即變「小皇帝」，出巡大過天！
前姊妹組合2R成員之一的家姐黄婉君（Rosanne），2011年為混血牙醫老公Derek誕下大仔白迅，去年又再誕下細仔白晨，向來身形纖瘦的Rosanne生完兩個小朋友並沒有走樣，已經極速收身，恢復昔日fit爆身材。日前身為人母的她身穿黑色貼身小背心，大騷手臂，抱着1歲大的細仔白晨，孖住戴cap帽的細妹黄婉佩（Race）、細細妹Ronda及近日從新加坡來港探孫的父母，一家人到中環的商場行街，盡享家庭樂。
三姊妹多斬獲
大約下午3點半，六人到正在減價的名店血拼，見Rosanne入到名店立刻將囝囝交給家人抱，Rosanne見大減價，一支箭衝去瘋狂揀衫，shopping大過天！Rosanne只顧着shopping，試完衫又試鞋，期間Rosanne的家人就負責輪流服侍BB，當正細仔係「小皇帝」。
當兩個妹妹去行街時，兩老行到攰就抱實孫仔玩，等三個寶貝女可以安心購物。六人在名店逗留約一個多小時大有斬獲，每人都一袋二袋，其後登上保母車離開。
文：音樂組
攝：追蹤組