張智霖101分男神

喺音樂路上，我隨時係轉公司最多嘅歌手，差唔多所有唱片公司都去過，係一件幾特別嘅事，某程度上令我對音樂事業冇咁有歸屬感，有時候反而覺得拍戲同電視劇有一種家庭嘅感覺。當然，我係一個知足嘅人，攞到獎或者首歌上榜，已經好開心，知足的確會常樂，就算得到其他人嘅讚美，自己唔會覺得飄飄然，畢竟喺呢個圈子咁耐，心態上幾成熟，目前會踏實地做我嘅工作，所以呢一刻咩都唔搞，首先要搞掂演唱會先！

釋放負面情緒

下個月6號至8號喺紅館舉行三場《Chilam Crazy Hours Live》演唱會，今次用「Crazy」做主題，因為我覺得香港市民經歷緊一個好瘋狂嘅時刻，好多嘢令大家唔係幾開心或者比較激動，所以希望從Crazy同好玩嘅角度出發，喺兩個鐘頭時間入面，同佢哋一齊開派對狂歡，等佢哋將最唔好嘅情緒喺嗰晚一次過釋放。所以對比2011年第一次搞紅館演唱會，今次心情好唔同，上次好容易「度（橋）」，只要將咁多年嚟最想做嘅嘢擺晒入去就搞掂，但今次唔得，做過嘅就唔會再做，唔可以重複，無論歌曲演繹同整體安排都要用唔同角度切入，換言之驚喜係必須。

數年前張智霖在台上展示操肌成果。	《衝上雲霄》開拍電影版，點少得Cool魔？	《十月初五的月光》令張智霖再紅爆。

個唱力求完美

話明一定有驚喜，Chilam笑言一切個唱流程必先賣關子，畀你估到，又點算好玩！

當年冇肌肉的張智霖一樣吸睛。	在台上與囝囝魔童父子一吻成為經典。	張智霖與袁詠儀經常晒恩愛。
放大圖片

譬如上次個唱對住老婆唱情歌《未婚妻》，嗰次已經做咗，今次就唔諗呢啲，同埋冇咁多私欲o架喇，想個騷好睇同流暢，並唔會單純為自己、太太或者囝囝，我係為觀眾而做o架！嘉賓人選方面暫時同公司研究緊，究竟邊啲朋友最令大家意想不到又最過癮呢？諗諗吓，或者周杰倫（Jay）可能係其中一個選擇，上年佢請我做個唱嘉賓，佢欠我一個人情，定抑或請番自己翻唱作品嘅原唱者呢？唔知呀！本來我有咁樣諗過，但唔想太容易畀人估到，我想好玩啲，要再諗過！

細數優勝之處

我覺得搞個唱就係要咁，力求完美，應該嘅，喺香港大家睇騷已經慣晒，舉例每個月都有四位歌手做演唱會，自己有咩優勝之處呢？想級數更加好，就要由自己度每一樣嘢出嚟，同時令我好期待今次演出，因為從一開始開會，就探討一切觀眾鍾意同埋令自己樂在其中嘅事，包括全港第一次嘅大型3D舞台效果、親自飛去比利時搵著名設計師Ann Demeulemeester諗服裝設計，仲搵咗內地節目《我是歌手》音樂監製梁翹柏合作，撞正蕭定一先生都係《我是歌手》忠實擁躉，所以大家有同樣感覺──就係一定要搵梁翹柏幫手。

不覺樂壇已死

一個視追求完美為「應該」的人，除對個唱有極高要求之外，處理每一個音樂細節，又豈能不一絲不苟？

上一隻大碟《DE JA VU》大部分都係翻唱老友嘅歌，唱之前有叫佢哋畀意見，有次問Aaron（郭富城）覺得我唱佢邊一首歌會好啲，經過認真探討，我揀咗《當我知道你們相愛》嚟唱，錄完之後畀佢聽，佢亦都覺得我冇丟佢架，咁就OK！至於碟入面用咗曲婉婷嘅歌做hidden track，其實都有原因，因為我特別鍾意首歌，但了解到碟內大部分曲目都係八十至九十年代，比起曲婉婷首歌舊啲，所以就作出變hidden track嘅安排。

同埋，好多人都話樂壇已死，我唔覺得喎，始終有好多生存空間，至緊要大家自強不息，盡量做多啲好嘢出嚟，每樣做到一百分，希望自己能夠做到啦！最近非常欣賞方大同隻大碟，覺得佢十足十天才，編曲非常好，自己有興趣合作。

後記

一個人有幾熱愛一件事，與其聽他講話，倒不如看其行為，訪問後一工作人員對我說：「Chilam呢個人其實真係好愛音樂，你睇佢出道廿幾年，出過廿幾次唱片，係keep住做喎，唔係人人得。」真的，Chilam做事有heart，加上細心的程度，感染小記把心一橫，把他歸入為人生目標之一，多謝Chilam！

口述：張智霖

筆錄：Lemon