千嬅感受童心眼濕濕
影后級人馬楊千嬅即將開拍真人真事改編的新戲，並與五位分別來自巴基斯坦及香港的五、六歲小女孩合演對手戲，媽媽級的千嬅與女孩們排戲時打成一片，更被女孩們感動到眼濕濕，母愛大爆發！
楊千嬅及古天樂主演的電影《五個小孩的校長》，改編自全港最低月薪「四千五百元校長」呂麗紅的故事，並由陳木勝監製、曾執導《流浪漢世界盃》的關信輝導演，電影公司開拍前一絲不苟，安排「千嬅校長」與小演員試戲，五位小演員排演一場千嬅病愈後的戲，話喊就喊，場面感人，令千嬅投入得眼濕濕。
拒囝囝客串電影
雖然與小朋友拍戲，小豆丁一旦扭計，局面將難以控制，但千嬅坦言期待正式開拍的日子，她說：「今次好有挑戰性！班小朋友好聰明，認知同記憶力好強，比我想像中排得順利。（做咗媽咪，識得點同小朋友相處？）咁當然會有耐性咗，會比未做媽咪時更caring，會識得同佢哋傾偈，等大家熟絡啲，套戲好有意思，有啲小朋友角度點睇香港教育，到Torres（千嬅兒子）識睇，會畀佢睇。（想Torres客串埋，母子檔留紀念？）拍戲太辛苦啦，我唔捨得！佢健康快樂成長，畀心機讀書，學到知識保護自己同幫助別人就夠。」
千嬅又讚呂麗紅校長俠義心腸：「呂校長直頭係女俠！我同佢傾偈，佢內心好強大，充滿責任感，佢嘅堅持、愛心、耐性、唔懦弱，可以話比男人更男人！我睇過佢上堂，好專業！我請教咗佢好多教導小朋友嘅心得，幫到我教仔o架！」
精挑細選小演員
關信輝導演則說：「呢套係五個小朋友加一個大人版嘅小朋友──楊千嬅嘅戲，佢哋六個嘅互動好有火花，呢五個小朋友喺四百個小朋友中精挑細選，表情、走位、明白劇本都做得好好，期望佢哋可以提名新演員。」
文：影視組