千語呆披嫁衣 默認冇得婚
林峯早前因腰患缺席上海電視節，但未痊愈已復工，更遠赴英國睇騷，跟得女友吳千語因工作排得密麻麻未能同行，未知是否心掛掛男友，於活動上她雖然身穿婚紗，絲毫沒有流露一份喜悅感覺，反之表現得若有所思，及後更坦言與男友還未有結婚計劃，支持男友所有決定！
早前因腰患取消多個活動的林峯，昨日與陳柏霖齊齊亮相於英國倫敦舉行的Burberry Prorsum 2015春夏男裝系列，西裝骨骨的林峯在場內與泰國女星Ploy Chermarn合照，完騷後更到後台與首席創意總監兼行政總監Christopher Bailey合照，全程表現興奮。
「過時過節有食飯」
這邊廂的林峯女友吳千語昨日穿上露肩低胸婚紗出席中環置地廣場呈獻的「53步踏上人生新一頁」活動，但不論台上台下也欠缺笑容，即使與可愛的花仔花女大合照時亦只強顏歡笑，全程表現得若有所思。受訪時，千語否認被指男友林峯醉心演藝事業而把婚期押後因而感不快，表示因一早工作，感到疲倦，而裙子又太緊，更透露暫時還未有結婚打算：「佢唔會放棄演藝事業。（佢家人唔鍾意你？）我哋拍拖，不嬲已經都有呢啲新聞，唔係第一次！（咁實情呢？）事實大家有一齊食飯，過時過節大家有食飯，亦會打電話，我唔使刻意解釋。」及後問她有否叫男友快些接管生意時，她說：「都解釋過好多次！（咁你想唔想佢接掌生意？）我支持佢所有決定，佢喺呢行好努力做嘢，事業都唔錯，其實依家好多家族都唔一定要子承父業，可以憑自己闖出一片天地。」她續說：「私下都有同佢（林峯）傾偈，我都知佢想喺呢行發展，話佢要退出唔係真！」
未能抽空陪男友
另外，談到林峯腰患未愈便要到倫敦出差，千語說：「佢都係為工作，（有冇叫你陪佢去？）我自己嘅工作都排到好滿，下星期又要開戲。」提到林峯弟弟林逸洺暗嘲她微博「收買」粉絲時，她表示不會這樣做。
文：名人組