何詩操肌三點式晒戰績
歌手何韻詩（何詩）近年生活健康，最近還愛上跳繩，自言修身成功的她，可以考慮以比堅尼示人，現時正積極操練「朱古力」。對於打高球，她笑言是高尚玩意，自己是慳錢窮歌女。
女星劉心悠、何韻詩、丁子高聯同觀瀾湖集團副主席朱鼎耀等，出席在尖沙咀舉行的「2014觀瀾湖世界明星賽」記招。其中何詩以白Tee襯黑色皮裙及高跟鞋，造型另類。問她可有打高爾夫球？她即自嘲說：「呢啲係高尚嘅玩意，我不嬲標榜慳錢窮歌女，打golf又要入會，又要買好貴嘅用具，我最近愛上玩跳繩。」
問她是否跳「雙人繩」？她笑說：「我未練到雙人，都係簡單跳，跳繩係最簡單嘅keep fit方法，可以練氣同練力，近呢一年身體改善咗好多，朋友都話我個樣唔同咗，（微調？）我都驚畀人誤會，其實只係自己似老人家生活，早睡早起，食得清淡。」記者笑問她可會拍比堅尼照展示修身成果？她笑說：「可以考慮吓，以前着出嚟嚇親人，身形未handle到，依家都操番有四舊腹肌，仲差兩舊。」
心悠做「跟得女友」
而同場的劉心悠就透露在加拿大讀書時也有學過打高球，還要考試，不過始終未培養到興趣，但若男友喜歡打高球，她也願意做「跟得女友」，她說：「陪男朋友OK，我又唔驚曬黑，我鍾意曬太陽，不過我最鍾意嘅運動都係跑步。」至於剛過去的父親節如何慶祝？她表示由於父母已離婚，父親住在加拿大，加上工作關係，故已很多年沒有慶祝，希望今年可以去探望爸爸。
文：名人組