克勤戥C朗心酸 怨拍檔屎波
世界盃賽事昨日凌晨由葡萄牙大戰德國，最後葡萄牙慘吞德國四蛋，葡萄牙靚仔主將「C朗」基斯坦奴朗拿度（Cristiano Ronaldo）在世界各地擁有不少星級粉絲，前晚賽果傷盡C朗迷心，李克勤表示睇到心酸，他認為C朗的拍檔發揮不好，難免C朗暴躁。
昨日凌晨舉行的世界盃G組首場分組賽由德國對戰葡萄牙，德國狂數葡萄牙四比零，葡萄牙靚仔球星C朗在比賽中未能踢出水準，且表現狂躁兼頻頻跟球證理論，令C朗迷大失所望。台灣女星陳妍希是C朗擁躉，她有留意「德葡大戰」，偶像所屬國家隊慘敗，她傷心得在社交網站上載以手遮眼代表無眼睇，兼嘴扁扁的相片，寫道：「我的葡萄牙，我的C羅（C朗在台灣譯名為C羅）……唉……」
至於美國樂壇天后Rihanna與C朗分屬老友，C朗更曾現場欣賞Rihanna的演唱會兼在後台合照。Rihanna在德葡大戰期間在社交網站為球員打氣，完場時她寫道：「My baby Ronaldo :(」以扁嘴表情表達為C朗感心痛，但她同時是德國隊粉絲讚踢得好。
「算好耐性」
香港藝人方面傾向撐C朗，李克勤自言睇到心酸：「一個咁好波嘅球員，但拍十個咁唔好波嘅球員，仲要有一個衝動到蠢成咁，佢都算好耐性啦！」名模琦琦為C朗講說話：「C朗梗係暴躁啦，其他隊員發揮得唔好，我係佢都忟，唔夠比比（被逐的葡萄牙球員）咁躁。」女子組合HotCha成員Winkie認為C朗因緊張賽事才表現狂躁。吳千語大讚C朗踢得好，只是沒運氣：「唔覺佢有脾氣，佢好默默咁踢好場波。」洪天明亦說：「唔知係冇咁嘅技術定係唔想踢，對手就好似復仇者聯盟咁，自己隊波就好似得得B咁，畀我都嬲啦。」而女星陳嘉桓則支持德國隊，但對C朗表現笑言：「C朗好靚仔，但啲隊友好茅，輸咗都可惜。」
文：名人組