香香鍛煉身手 防異性亂埋身
向來睇得的岑麗香與何佩瑜（Jeana）近日於新片挑戰連場動作戲，齊齊練得好武功。香香笑言做「女警」後唔怕再被人蝦，dry爆的Jeana則乘機招親，直言已練得好身手有能力保護異性。
圈中多位靚女岑麗香、Jeana、李元玲及鄭欣宜等近日忙拍新片《辣警霸王花》，眾女於多場動作場面博到盡致周身傷，但她們依然負傷上陣繼續拍攝。其中一幕講述她們於學堂接受各種高空訓練，少啲體能都唔掂！眾女拍攝前擔心成為NG女王，但最後大部分人均一take搞掂。
Jeana習武招親
香香體能極Fit毫無疲態，難怪拍攝後與監製黃永峰拿着繩索影相時表現得戚，相反欣宜則成包尾大幡！不過欣宜笑言會於槍戰中為自己平反，更即場向其他演員下戰書，決定拍攝後再來一場真實對決。香香直言相當辛苦，但可趁機鍛煉身手，笑言現在可以一打十，冇異性可亂埋身。她說︰「依家自己嘅身手好咗好多，所以大家唔使諗點去蝦我，我已經係一位打女。」
Jeana亦笑說︰「如果有男仔想人保護，我落意効勞，唔止男仔可以保護女仔，其實有時女仔能夠保護自己，仲可以保護番男仔轉頭。」問會否怕太好身手以致冇仔敢埋身？她說︰「自己一向都咁dry，反而多咗樣嘢去吸引異性，仲可以一齊切磋身手，所以大家快啲嚟啦！」
文︰專案組