祖兒雄心壯志拜秋生為師
【曹家誠佛山直擊】樂壇天后容祖兒連同黃秋生及任達華兩位影帝，現身佛山出席電影院開幕，祖兒更表示希望跟秋生學戲，秋生聞言即笑說：「即刻交學費啦。」
容祖兒、黃秋生、任達華及英皇集團主席楊受成博士昨日現身佛山，出席位於南海怡豐城的「英皇UA電影城」開業典禮，吸引近千名市民圍觀逼爆商場。
活動由范振鋒和冼色麗任大會司儀，嘉賓們逐一上台致詞，並進行打手印儀式。其中祖兒在台上表示，自己雖是歌手，但熱愛電影，又笑稱：「我以為睇多啲戲演技會好，但原來唔係。」祖兒又稱平日喜歡到機場的戲院，貪其人少感覺像包場。而自言近年少入戲院的秋生，透露年輕時亦試過一日睇幾套電影，旁邊的祖兒即笑問：「係咪油麻地戲院嗰啲鹹濕戲？」
跟秋生和華哥兩位影帝同場，祖兒表示：「啱啱先睇完秋生同張敬軒嘅舞台劇，先至知道原來秋生有教戲，都想跟佢學嘢。」在旁的秋生即笑說：「係就唔好問啦，即刻交學費啦。」祖兒再追問秋生：「學完係咪有明顯進步？」秋生即舉例說：「你睇吓張敬軒就知啦。」
生日唔鋪張
活動尾段有歌迷在台邊送上禮物賀祖兒生辰，在旁的華哥見狀即上前代祖兒拿禮物。雖然下星期一正日生日，但祖兒受訪時表示未有特別安排慶祝活動，包括跟男友劉浩龍慶祝，她說：「身邊朋友好好，不斷送驚喜畀我，又同我切蛋糕，自己都三十幾歲人，唔想特別鋪張。」有報道指早前祖兒出席歌迷聚會時被催婚，對此她說：「佢哋咁講啫，我暫時未有咁打算。」
文：音樂組