樂基兒開心要緊 懶理肚凸凸
近年在峇里生活的樂基兒特地返港出席活動，身穿貼身裙的她凸現小肚腩，不過她自言自己並非肥，而是運動身形比較大隻，在美國她依然是穿加細碼服裝，她亦不會去操fit身材，因現在她已不用行時裝騷，肥瘦都不重要，最緊要開心。
樂基兒（Gaile）昨日出席Starbucks活動，穿上貼身連身裙的Gaile現出小肚腩，問她可會做運動操fit些？她說：「我做運動身形比較大隻啲，有肌肉，我磅數輕咗，本身個body shape係運動型，唔係好瘦好排骨嗰啲，我依家唔使行騷，啲客戶亦冇投訴我。（你有小肚腩！）身體健康就得，肥唔肥唔緊要，我都已經係一個designer，做好多office嘅工作，唔使行fashion show，最緊要係開心，同埋我又唔係肥，喺美國我係着XS。」
珠寶生意理想
Gaile曬得一身深古銅色，被問到現在可是她曬得最黑的時候，她說：「唔係，每逢夏天我都會做好多運動，好似滑水，可能會再曬得黑啲，打破自己紀錄。（唔怕會冇咗護膚品廣告？）唔會，我好快可以白番，敷吓mask就得，啲客戶都知我好健康，會做運動，主要係睇我啲膚質好唔好，多過睇我啲膚色係黑定白。」提到她的珠寶生意，Gaile表示銷售成績理想，她說：「我想慢慢做，慢慢試，啲客反應都好好，有幾個款都賣晒。（咁咪賺好多？）唔係因為錢，係嗰份passion而去做，我唔係想變成一門大生意要開好多店。」
活動完畢後，Gaile就到了中環與男性友人shopping，在名店中又試鞋又試手袋，不一會已買了幾袋戰利品，之後便乘坐七人車離開。
文：名人組
攝：追蹤組