吳浩康引女埋身 鍾舒漫死跟
英皇歌手吳浩康（Deep）自從戀上師妹鍾舒漫（Sherman），即表現得修心養性，人前人後都表現得好煙韌，但昨日Deep卻遭人爆料，暗指他參加船P溝女，Deep重申女友對他行蹤瞭如指掌，Sherman也對男友投以百分百信心票，並笑言下次開P會跟埋去。
Deep跟Sherman拍拖後就修心養性，兩人時刻都表現得好恩愛，不過昨日有讀者向本報爆料，提供一張日前阿Deep遊船P的照片，照片由一位名叫Chixg Chixg Fxn的網友於facebook上載，船上阿Deep赤裸上身手搭住少女膊頭，少女個樣就刻意打格，並留言感謝Deep百忙中來到這個船P，又指船上很亂，但Deep親切對待，對他們又友善，並盡情陪伴他們玩。
禮貌合照
雖然照片中阿Deep與少女並沒有任何親密舉動，但爆料人擺明指Deep溝女，Deep透露當日是應表哥邀請參加船P，船上好多人都不認識，該像15、6歲的少女邀他合照而已，他說：「人哋禮貌叫我影相，我冇理由唔影，咪此地無銀，好似不近人情，但如果影完啲人又去爆料，我覺得好無聊，咁樣好討厭。」Deep表示Sherman知道他去船P，覺得是好普通的事，他亦覺得沒有甚麼好避忌，他說：「每日我嘅行蹤Sherman都知道，我最介意係影到我個肚腩好肥。」他希望記者幫他cut走肥腩。
投信任票
Sherman則在電話中對男友Deep投入百分百信任，她說：「我知佢去船P，嗰日我同妹妹去咗睇詹瑞文舞台劇，因為我好怕曬黑，我對佢絕對信任，遊船河好普通嘅事，我只係擔心作為藝人，每次有類似嘅照片漏出去，擔心會影響到形象，（可能佢受以前負面新聞所累！）冇理由成日攞以前啲嘢來講，咁對一個人好唔公平，（下次叫佢帶你去！）下次我死都跟埋去。」
文：音樂組