林峯床上Chok親傷腰甩底電視節
【呂詠雯上海直擊】林峯拍戲受傷屢見不鮮，原定出席本屆上海電視節宣傳造勢的他，「臨門一腳」卻因起床時Chok親腰患求醫而未能登機，被迫臨時甩底，惟有將重任交予徐子珊及黃宗澤（Bosco）等人。不少峯迷早早到場霸位見偶像，當聞得阿峯受傷，難免擔心及失望，而今次受傷，未知會否影響阿峯的巡迴演唱。
林峯名副其實的「容易受傷的男人」，多年來身體各部位上至頸椎，下至腰股都「多災多難」﹗年前拍攝電視劇《花花世界花家姐》期間，他試過因頸椎移位入院，而接拍電影《忠烈楊家將》時，又被拍檔鄭少秋踢爆他因騎馬戲搞到屁股磨傷甩皮，加上道具盾牌太重關係，同時chok傷左手。2011年舉行演唱會期間，阿峯又因爆玻璃弄傷右手流血不止。昨日阿峯再次「當黑」，起床時因動作太大觸及腰部舊患，即時感到痛不欲生，原本趕往機場到上海宣傳的他，最終改往醫務所求醫！
千語關心祝康復
阿峯上海之行原本與徐子珊、Bosco、佘詩曼、苗僑偉及黃智賢等，代表無綫出席「第20屆上海電視節」的宣傳活動，而內地粉絲早已聞「峯」而至，早早到場霸位，現場被擠得水洩不通，當大會宣布阿峯未能依照原定計劃亮相，不少峯迷難掩失望之餘，更擔心偶像傷勢。記者事後與其經理人Candy取得聯絡，她透露：「佢睇咗醫生，目前要多啲休息，未嚴重到要留醫嘅。」身為阿峯女友的吳千語表示得悉男友受傷，同時亦關心地祝他早日康復。
《點》劇5千萬點擊
因阿峯缺席關係，宣傳重責落在子珊等人身上，幸而子珊相當識做，昨日以露腰裝亮相勁冧粉絲，而早前缺席新劇《點金勝手》各項宣傳的Bosco，終於完成內地劇集的拍攝工作「歸隊」，且公布好消息謂：「套劇反應唔錯，網上點擊率有成5000萬次。（點樣補償你之前冇宣傳，請大家食飯？）肉隨砧板上囉。」他又搞笑表示倘若成績再好的話，叫身為女主角的子珊「露肉」，換來子珊「反擊」﹕「咩呀，我喺纖體廣告咪露咗囉。其實我喺劇裏面有大露背戲，收視再好咪叫監製將場戲剪長啲囉。」Bosco即答：「咁我都露心口嘞。」
而今次無綫於上海電視節的宣傳攻勢浪接浪，繼重點宣傳《點金勝手》及林峯主演的《使徒行者》外，《醋娘子》及《老表，你好hea﹗》等新劇的大型燈箱亦擺放在當眼處，而黃秋生主演的《梟雄》即使倘未正式開拍，亦成推介之一。