彭順未氹掂老婆擔心Liddy

彭順上月被拍得偷嗒o靚模李悅彤（Liddy），之後Liddy被揭是九龍灣吞槍自殺槍手之女兒，事件轟動全城，潛水多時的彭順昨日終於現身，由馬來西亞返港轉機往北京工作。據知彭順一方面愁爆仍未獲太太李心潔原諒，需繼續努力箍煲。另邊廂，偷食事件曝光後，彭順已跟Liddy失去聯絡，他擔心年紀輕輕的Liddy未能面對喪父等接二連三的打擊。昨日面容憔悴的彭順揚言希望可冷靜一下，並否認給了一筆錢予Liddy，直言故事編得太離譜。

彭順昨日返香港再轉乘飛機往北京傾談工作。

彭順早前被拍得搭上o靚模李悅彤（Liddy），之後他即飛返馬來西亞向太太李心潔箍煲，同時，Liddy屋企遭逢巨變，其父李德仁早前疑在九龍灣啟晴邨殺人兼吞槍自殺，事件極惹人關注。至昨日，在馬來西亞閉關多時的彭順終於現身，清減了不少的他從馬來西亞返港，再轉機到北京傾工作，彭順曾在香港機場禁區的快餐店醫肚，見他胃口普通，當他邊上機邊接受傳媒訪問時，樣子亦帶點憔悴，語帶無奈。

彭：彭順　記：記者

記：係咪畀咗筆錢安頓Liddy？

彭：全部編出嚟，我都編唔出來！

記：你係咪同Liddy承諾過，會同李心潔離婚再同佢結婚？

彭：無，全部都係捏造出嚟，無咁嘅事。

記：知唔知Liddy父親嘅事？

彭：知道。

記：警方有無聯絡你？

彭：無，但我都想知道情況，了解多啲，睇吓發生乜事。

記：會唔會係因為你哋嘅問題刺激到Liddy爸爸？

彭：唔答。

記：你有無同你個女傾過件事（指Liddy偷食事件）？

彭：同個女都有傾過。

記：個女有無乜嘢表態？

彭：唔答。

記：同李心潔關係點？

彭：OK啦，家事唔答，想cool down、安頓自己。

記：安頓咗屋企人未？

彭：要先安頓咗自己。

與Liddy失聯絡

據彭順身邊好友透露，彭順仍未氹掂李心潔，所以彭順心情仍愁爆，亦明白自己今次鑄成大錯，必須承擔責任，要做很多事才能再獲李心潔信任及原諒，彭順好友說：「發生咁大件事，唔係一朝一夕可以解決，佢（指彭順）要花好多心機再獲老婆信任。（之前李心潔喺馬來西亞殘爆睇醫生？）咁啱胃痛，件事未至於要去睇醫生。」好友還指彭順今次返內地工作，亦會極速返馬來西亞陪老婆，希望獲原諒。