趙哲妤 夥家人買樓免被呃
「中國小姐」趙哲妤（Uny）昨日為婚紗騷擔任模特兒，她透露剛成為業主，她興奮地說：「我買咗荃灣一個樓盤，面積七百呎，約六百萬，係我同家人聯名，因為佢怕我畀男人呃。由屋企人畀首期，我負責供，所以我要努力工作。」向來跟家人同住的Uny稱稍後便會搬到新屋獨居，她坦言也有點擔心，並笑謂：「我又怕黑又怕鬼，仲怕老鼠曱甴，但無理由請傭人，同傭人同居。」
不過，Uny表示今次並非首度當業主，大學畢業時已獲家人送樓作獎勵：「但層樓係屋企人畀首期同供，而且係租出去，租金又唔係落我袋，所以感覺同今次唔同，今次買樓前一晚我真係緊張到瞓唔着。（你嘅目標係有幾多物業？）大約六個，希望每個月有十萬蚊租金收入，咁我就可以退休喇﹗」