馬賽認專業 照講汪子琦
馬賽早前與內地女製片人汪子琦傳緋聞，最終獲無綫開綠燈原諒，雖然降呢當娛樂主播，但馬賽仍視之為挑戰。昨日馬賽現身鬧市活動時，坦言開工四日仍未習慣，但自誇專業，若然有需要，不會因個人理由避開報道有關對方的新聞。
馬賽、許亦妮、何傲兒、沈卓盈等「世界盃大使」昨日出席「myWorldCup」App宣傳活動，於街頭大玩射十二碼。
剛加入當娛樂台主播的馬賽，透露已返了四日工仍未習慣，皆因要一手一腳搵資料及寫稿，感覺如趕交功課般，幸好NG由3次減至1次，令其總算有點成就感，她謂：「要追趕同事進度仲有一段距離，我NG佢哋都陪埋我，（請食飯？）本來想請，但每日寫稿連食飯都冇時間，希望過幾星期會好啲！」談到曾與她傳緋聞的汪子琦近日公開現身，馬賽表示沒有留意，她謂：「做新聞都冇呢條片，人要向前望，過去唔想再提。（會唔會避開佢唔報道呢段新聞？）我個職位係專業嘅。（佢話唔想再提起你！）我冇同任何人對立，同佢有關嘅嘢都唔想提。」
蕭正楠愛得高調
同場的何傲兒則透露父親今天生日，已親手焗製曲奇當禮物，對於家姐何傲芝舊愛蕭正楠與女友黃翠如高調拍拖，何傲兒也直指對方高調，但不欲多談，問到有否戥家姐不值？她謂：「冇話抵唔抵，拍拖開心就一齊，抵唔抵唔需要去衡量，係每個人處理手法，家姐都唔愁，好多朋友仔。」
至於沈卓盈談到近日圈中喜事連連，問到與拍拖年半的男友何時拉埋天窗，她笑謂：「係都對方計劃，佢未求婚，但依家係開心。（係咪你Mr. Right？）唔講住，唔好畀佢咁淡定，一於吊高嚟賣。」
文：影視組