歌手姜文杰（Benji）對於胞妹姜麗文（Lesley）「男友」鄭俊弘（Fred）疑劈腿，他接受電話訪問時表示Lesley「失蹤」：「我唔係同阿妹住，有打電話同WhatsApp佢，但佢未覆，可能瞓咗覺，不過佢成日都係咁（搵唔到）嘅。」
Benji謂Lesley從沒承認和Fred拍拖，大家只是朋友，而他跟Fred也相識十幾年，以前經常見面，但近幾個月就少見Fred，他謂：「佢紅咗，工作比較忙。」他亦聞得Fred「帶女夜遊」，還問女方是誰，得知該女是「巨聲幫」的歌手王嘉儀時，他說：「站喺朋友立場，如果佢（Fred）真係拍拖咪恭喜佢，如果唔係，叫佢小心啲，因為佢紅嘛，多咗曝光，可能有啲女仔會約佢出嚟食飯，跟住擺佢上枱，又或者係咪佢哋有劇出，做宣傳呀？」Benji又話自己不八卦，不會刻意致電Lesley或Fred追問。