Alan拒靠富妻 巡迴撲水買樓
樂隊Mr.主音布志綸（Alan）親證年底迎娶富家女Sally，雖然未婚妻家底豐厚，但Alan堅持婚禮不用女家一分一毫，寧願捱生捱死去拚博，希望為未來太太打造一個舒適安樂窩，視他如世姪的校長譚詠麟得知Alan將成十億駙馬，即戲言：「叫佢整啲嚟！」認真盞鬼。
樂隊Mr.的主音Alan與富家女Sally拍拖四年，終修成正果，Alan被《好報》獨家踢爆將於年底迎娶女友Sally，據知Alan在今年情人節向女友求婚成功，兩人正積極籌辦婚禮，將大排筵席宴請親朋，由於Alan的未婚妻Sally名副其實是千金小姐，但他不希望招人口實，過去幾年他努力儲蓄，死慳死抵揸殘車、着舊衫、就連出街食飯找番廿蚊都畀女友袋埋，難怪堅持婚禮一切開支由他獨力承擔，不要未來外父「出手」資助。
為夢幻婚禮狂吸金
Mr.忙於到內地、台灣、東南亞巡唱做騷，Alan昨日身在馬來西亞透過經理人承認婚訊，問到他婚禮籌備如何？他說：「因為一直忙緊國語碟宣傳及巡唱，好多婚禮嘅事都交畀女友搞，都辛苦佢。」低調的他不欲多透露婚禮一事，Sally被指是富家女可有令Alan感壓力？他說：「唔會有壓力，我會努力做好工作，希望將來畀到個舒適環境同幸福生活佢。」
雖然年底才舉行婚禮，但Alan被影到與女友已經在南區薄扶林築愛巢共賦同居，Alan愛得坦白說：「嗰度係租嘅，我目標當然都想買樓，總之我會努力o架啦。」Mr.入行至今已演出超過600場live騷，為夢幻婚禮Alan更是拚博，今年上半年Mr.馬不停蹄唱了幾十場，估計吸金超過七位數，Alan笑說：「我都想，我哋係五個人分，我都想賺多啲。」
譚校長：叫佢整啲嚟！
Mr.甫出道即獲「校長」譚詠麟（阿倫）扶持，其中主音Alan更與阿倫同一英文名，相當有緣，所以阿倫昨晚出席活動時，記者問他Alan年底結婚，被封為十億駙馬，阿倫勁搞鬼笑說：「十億，真定假？咁好笑，叫佢整啲嚟，佢係娶定入贅？」阿倫覺得不是樣樣事都向錢睇，他認識的Alan對音樂好熱誠，婚後依然會熱愛做音樂，他也戥世姪開心，笑說：「依家消息出咗，等佢自己報番嚟，我唔會打去問，但點都係恭喜晒佢。」 文：音樂組