霆鋒買重保旅遊塔跳高

王菲舊愛謝霆鋒,近日忙於主持節目《十二道鋒味》,被網友發現他與嘉賓Angelababy(楊穎)現身澳門,只見孭住背囊的霆鋒,與叉腰Baby站在食店門口,似在等候指令。霆鋒經理人霍汶希(Mani),昨在電話中承認霆鋒身在澳門拍《十》節目:「佢將會喺澳門旅遊塔挑戰空中漫步,會喺二百幾米高嘅塔外圍跑同跳。佢唔畏高,但都唔鍾意高。」

作為節目製作人及霆鋒經理人,Mani已幫霆鋒買重保險:「每次見佢挑戰高難度動作,都搞到我心跳加速,好大壓力,為呢個節目幫佢買咗超過一億港元個人保險。」Mani指霆鋒拍戲一向搵命博,今次節目輕鬆為主,不想玩太激:「佢有諗過試高台跳水,但我唔畀,佢根本冇時間練,好易受傷,之前阿Sa(蔡卓妍)就係咁受傷,令我有陰影。」Mani昨日凌晨上載與霆鋒在澳門米芝蓮一星級法國餐廳,大擦法國餐的照片,認真識食!