千語操人魚線挑戰激情戲
林峯女友吳千語昨日在活動上大騷22吋小蠻腰，正操練人魚線的她透露將於新戲中飾演一名有小姐脾氣的港女，戲中還有激情親熱鏡頭。不過她就表示自己在真實生活中並不會發男友脾氣，自稱只是急性子，不屬於小姐脾氣。
吳千語昨日以露臍裝出席時裝店Germain開幕活動，同場還有主人家陳柏熹與父母及妹妹、關心妍和上山詩鈉等。
大騷纖腰的千語被問到腰圍多少，她說：「22吋，練緊人魚線，依家興，教練話我個身冇脂肪，好易練。（同男友林峯一齊練？）大家各有各練。（男友有冇人魚線？）佢應該有，佢之前拍戲好緊湊，冇乜時間去操。做運動要好有恒心，一星期要做兩次。（好耐冇見過佢啲肌肉？）好耐冇見過面，因為大家都唔得閒。（尋晚你唔去澳門睇佢開騷？）要做嘢，尋晚同新戲嘅導演、劇組食飯開會。」
演心地善良港女
千語透露即將開拍的新戲戲名是《王家欣》，亦是她戲中角色的名字：「個角色有少少小姐脾氣，同埋我知道有一場親熱戲，都幾激。（點激？）情緒有少少激動，同埋有少少親熱。（男友OK？）佢拍嗰啲勁好多。（唔畀佢探班？）都唔會。（你做港女？）係，心地善良，有少少小姐脾氣。（你會唔會發男友脾氣？）係我自己個人心急，未去到要發脾氣。」
陳柏熹指JM豪放
同場，陳柏熹對於前緋聞女友Janice Man日前與的士車行太子爺鄭子邦傳緋聞，他認為是誤會一場：「佢（JM）每次飲完酒都比較親密，同豪放啲。（你話佢豪放？）呀，唔係，我講錯咗，我意思係佢會care free少少，即係放鬆啲。」笑言自己也曾被JM捽面。而歌手關心妍早前以化名C-12之名推出新歌，昨日她自言是以C-12的身份出席。
文：名人組