Fuying & Sam讚港女有taste

馬來西亞組合Fuying & Sam日前來港宣傳，談到兩地文化差異，兩子竟然大講扶手電梯：「香港啲扶手電梯速度好快！可能因為馬拉人多數着傳統服飾出街，件衫係長身設計，上落電梯冇咁方便，所以電梯速度慢啲；仲有香港女仔着衫好有taste，識得突出自己。」此外，兩子又分享收過最特別的禮物，Sam表示：「係咖啡機，但我唔飲咖啡，不過全公司同事都好開心！」Fuying則透露收過紙摺企鵝公仔：「我瞓覺會攬企鵝攬枕，所以成日畀經理人拎嚟講笑，冇估到粉絲會記住，仲整咗紙摺公仔畀我！」