何傲芝眼濕濕：唔想提呢兩個人
面對舊愛蕭正楠（Edwin）高調認戀黃翠如，身為輸家的何傲芝昨日孤身一人行商場散心，無奈憶起傷心事不禁眼濕濕，並揚言不想提「如楠」兩人。反觀「得寵」的翠如BB，則冧爆多謝有人錫。
Edwin前晚在無綫節目《東張西望》公開表白追翠如BB，強調對方絕非小三，惟舊愛何傲芝在微博寫上一句「邪不能勝正」似有暗示，令三角關係變得耐人尋味。何傲芝昨午二時許獨自駕車離開將軍澳寓所，前往尖沙咀商場。本來面帶笑容落車的她被問心情如何時，面色頓時一沉並一度封口，期間又拒絕回應「邪不能勝正」的言論。
笑容不自然
提到Edwin及翠如，何傲芝臉色突變，笑容毫不自然，當問到Edwin對翠如及她的態度有很大差別時，她沉默不語。再問覺不覺兩人合襯？何傲芝稱：「唔想回應！（唔想提呢兩個人？）係！唔講喇！（唔想有關係？）多謝晒！」雖然講得決絕，但無奈憶起舊情時，何傲芝不禁眼泛淚光，全程低頭默不作聲，然後搭電梯上商場，至下午約5時才離開。
何傲芝昨晚再接受電話訪問，她繼續封口拒談三角關係：「過咗去就過咗去。（屋企人擔心？）家人唔擔心，知我自己識處理，好多謝佢哋支持我，同埋妹妹陪我。（放假？）暫時手頭上仲有好多工作。」她又否認因感情問題影響與無綫傾續約：「我唔係公私不分，公司亦畀咗好多機會，希望可以繼續合作。」
另一主角翠如昨日返電視城工作時表現避忌，提到何傲芝「邪不能勝正」言論時，她說：「對唔住，對唔住，唔回應。」問到有否被Edwin感動？她謂：「感激所有錫我嘅人，所有嘢順其自然，自己想簡單啲。（有壓力？）所有工作都有壓力，我自己都記性差，心情OK。（戀情有障礙？）好難答呀，順其自然啦！」
為愛人平反
至於Edwin昨晚在電話上坦言有跟翠如BB聯絡，問是否公開關係？他答：「未話咩公開，想大家畀啲空間我哋。（怕被大做文章？）已經交代咗，都係想幫佢（翠如）平反雜誌講嘅野，以後嘅嘢係我哋兩個人嘅事。」自從Edwin公開力追翠如BB後，不少網友都分別在三人微博「洗版」，實行各有各撐。有人支持Edwin的新戀情，亦有人質疑翠如是第三者，同時亦有人認為何傲芝應從三角關係抽身。
文：專案組
攝：追蹤組