郭晉安求婚 攬啜萬綺雯
郭晉安（安仔）和萬綺雯（蚊蚊）前晚在金鐘拍攝無綫劇《老表，你好hea！》，劇情講述跌倒的蚊蚊獲男方錫手呵番，她又主動向對方送「肉嘴」。之後，成功當選立法會議員的安仔，向在背後支持他的蚊蚊下跪求婚，他更不惜大跳騎呢求婚舞，成功抱得美人歸後，興奮地托起女方自轉，場面sweet爆！
問到吻戲有否尷尬？安仔笑言在飛鵝山拍畢《老表，你好嘢！》戲份不再尷尬：「上次大家貼身綁喺棵樹度，拍完後發覺再冇尷尬，連老婆睇完都話以後對我同任何女仔再拍親熱戲都唔會尷尬。（肉搏戲都得？）未知喎，等我挑戰佢嘅底線先。」蚊蚊即笑道：「你搵第二個挑戰啦！（拍吻戲老公有呷醋？）唔會，佢好信安仔。」安仔多次單膊舉起蚊蚊，有否感到吃力？他賣口乖說：「比我想像中輕，開頭睇劇本都驚自己唔得，啱啱抱住發覺好輕，以為佢得100磅，但覺得佢肥過上次少少。」而蚊蚊坦言現時體重達110磅，比《老表，你好嘢！》時重14磅。
談重播《殭屍》尷尬
提到亞視重播《我和殭屍有個約會》對撼外購劇《西遊記》，問到有何看法時？在《殭屍》劇中飾演馬小玲的蚊蚊尷尬笑謂：「冇得點睇，已經播咗咁多次。（有睇『歲月留聲』頻道重播？）冇，邊有時間睇，日日都開工。」安仔則抵死道：「佢哋應該整個《我們的萬綺雯》，播完《殭屍》劇再喺黃金時段重播佢以往嘅劇。」由於蚊蚊未能參與亞視活動，他建議亞視在《老》劇拍攝場地搞自助餐慶功。
文：影視組