鄭多燕私插主辦商孫敬安反擊：佢車大炮！
紅遍網絡的韓國瘦身天后鄭多燕，前晚為其一連兩晚的萬人跳舞騷揭開序幕，不過門票卻破紀錄滯銷，賣出僅300張，令兩場騷勁蝕200萬，鄭多燕不忿下，昨日私自開記招進行大控訴，力數主辦單位四宗罪，而主辦商孫敬安昨晚獲悉指控後感不滿，亦對鄭多燕的指控逐點駁斥，並質疑對方號召力，隔空開火！
一連兩晚的《鄭多燕萬人熱辣Show》前晚於香港會展舉行首場演出，不過這位網絡瘦身天后卻吸納不到觀眾，令兩場門票嚴重滯銷，7000多張門票只賣出300張，打破紀錄新低，亦令主辦單位勁蝕200萬。面對種種負面報道，昨日下午鄭多燕由公司老闆及4個跳舞助教陪同下，透過翻譯私下聯絡傳媒開臨時記招，並逐點向主辦單位進行大控訴。
插門票貴 貨不對辦
對於在天雨下開騷，鄭多燕指曾擔心粉絲未能到場，幸粉絲們也表現熱情，問到會否因被指入座率不高而不高興？鄭多燕透過翻譯謂：「尋日先見到場地，用萬人騷做主題誇張咗，其實今次收好少錢，係啱啱夠用嘅數目，今次目的係一齊做運動，但入場費係貴咗！」她更否認前日因眼晴痛不接受訪問。
鄭多燕重申向來做運動不會以錢行先，自言只是健康傳道師，並非藝人身份，暗指主辦單位只為賺錢，問到是否不滿意今次安排？鄭多燕謂：「之前溝通時有4個screen、旋轉舞台同4個攝影機，到場冇就覺得好徬徨，惟有執生叫助教企4個角去教，本諗住落地同粉絲一齊跳，冇cam跟住做唔到。」直言雙方思想不同，更為溝通與實際情況不同感可惜，未能與粉絲近距離接觸。
對於主辦單位指今次活動勁蝕200萬，問到是否因此減少器材？鄭多燕對此表示不知情，亦未有聽聞，那日後會否要求合作者搞免費活動？她斬釘截鐵謂：「我唔會再同商業機構合作，自己投資番，之後秋天會同主題公園合作舉行免費騷。」而鄭多燕公司老闆Roy則透露合約上有列明細節，如今未能兌現實屬違約，不過他們未有想過追究，只是感到失望。雖然鄭多燕與主辦單位各持己見，但眾嘉賓如阮兆祥、陳嘉佳、楊思敏仍未受影響，昨晚如常演出。
暗寸對方冇號召力
至於主辦商老闆孫敬安昨與太太盧敏儀於開騷前，逐點還擊鄭多燕的不滿指控。自爆心情麻麻的他不惜自揭肚皮大爆門票滯銷慘況：「本身有7000張門票淨係賣出250張，之後我哋靠團購割價賣飛，都係賣多咗50張！（鄭多燕號召力唔夠？）事實我已經講咗，大家自己諗！」談到她於首場不受訪，他指對方一早以短訊講明唔做，故他才為她「打圓場」稱眼痛不受訪：「佢係擘大眼，車大炮！」對於舞台設施不符預期，他稱因對方怕生意外而取消旋轉舞台，他又不禁寸爆對方未做過大騷。而鄭多燕稱開騷唔係為錢，他自爆為對方花費超過一百萬：「佢要求住指定的五星級酒店，要包埋商務機票同普通機票，仲要一次過畀晒錢，佢唔係為錢為咩？佢嚟玩定係做嘢？」身旁的盧敏儀稱雙方不會再合作，而孫敬安則稱「唔使錢再睇吓點」。
文：影視組