家燕甜入心恨飲女婿茶

珊珊今次如此有心思，選擇製作cupcake，她說：「因為媽咪好鍾意食嘢，尤其甜品，甜嘢食咗會開心啲，cupcake又的骰，所以想整畀媽咪試吓。其實媽咪年年母親節都要工作，今年會去新加坡登台，我有工作行唔開，所以代表細佬同妹妹，提早同媽咪慶祝。我哋三姊弟都好鍾意食嘢，細個食媽咪煮嘅餸，食到肥嘟嘟，媽咪學過烹飪，熱葷、主菜、甜品樣樣識煮，我冇佢咁叻，所以就整簡單嘅cupcake畀佢試。」

保健機做運動

家燕姐大讚珊珊做的cupcake不只甜，更有愛，她說：「仔女一向都好乖，好注重母親節，我近年雖然少食甜嘢，但係啲cupcake細細塊，食落去感受到好大份嘅愛。我間中會自己煮嘢食，頭先技癢都同珊珊合作整咗幾個！除咗整cupcake，珊珊又同細佬妹送咗個保健器材畀我，可能知我年紀大，關節唔好，有舊患又冇時間運動，佢哋想我用咗部機後，血液循環好啲，佢哋三姊弟好有心！」

要留意身邊人

其實，家燕姐最想的是見到子女成家立室，問她是否想飲女婿茶、新抱茶？她笑說：「哈哈哈，我都心急想飲o架！我成日同珊珊講，工作點忙都要留意身邊人，有時間就同男仔出去食吓飯，但佢左耳入右耳出，話同我一樣事業心重喎！」

珊珊代表弟妹錫啖媽咪，家燕姐冧晒。	家燕姐技癢，幫手一齊整cupcake。	家燕姐冇時間做運動，子女送保健機幫手。

文：影視組