蔡少芬投資有道：老公唔准我死
藝人蔡少芬昨為剪綵活動擔任嘉賓，期間自稱掌握家中財政的她大爆老公張晉「唔准佢死」，原因竟是要她分配好資金，皆因老公不諳投資，靠晒她打理家中財政！
蔡少芬（Ada）昨日以一身白色露肩短裙打扮，與曾志偉及陳展鵬為投資公司開業擔任剪綵嘉賓，她自稱「投資成功」搵到好老公張晉，認真幸福滿瀉！受訪時她又爆掌握家中財政大權：「因為老公唔鍾意投資（佢唔過問你點投資？）係，就係咁先激死，我會主動話佢知做咗咩投資，佢就淨係問我祈咗禱未，如果祈咗就OK。」
讚孫儷B女靚
Ada又笑稱老公「唔准佢死」，因為要她將資金分配好先：「我成日要坐飛機咁危險，我就同老公講定資金點分配。點知佢話『你唔好死住，要搞埋啲資金投資先』。（投資得利？）試過賺double，我見好就會收，不過洪欣就試過走唔切。」談到曾合演劇集的孫儷疑「超生」，她說：「我唔清楚，最緊要母女平安，（睇過B女？）冇，但一定靚啦！睇我同我老公出啲貨就知！」
撐陳慧珊專業
問到投資娛樂公司的曾志偉，有關報道指陳慧珊「扮大牌」缺席無綫新劇宣傳？志偉大讚對方專業：「唔好誤會，我同佢合作得非常開心，因為佢想專心讀書考試，佢喺套劇裏面奸到出汁，我好欣賞佢！」談到會否與林峯及陳法拉簽約？他說：「林峯已經咁紅，唔使我捧，冇需要做佢經理人，大家未傾到咁詳細。（簽埋陳法拉？）唔算係，但佢好有上進心。」至於陳展鵬則透露曾投資獲利六位數字，未來數年會繼續留港發展。
文：影視組