岑麗香氹古仔送鞋子

岑麗香與古天樂昨日到銅鑼灣出席鞋履手袋品牌活動，香香低V裙亮相，微露南北半球的她說：「少少性感啦，今日特登着鮮色啲，祝福新舖開張！我做足準備，黐晒膠紙。（酬勞加好多？）公司處理，我唔知，我當然想加。我廿幾歲女，人生第一次坐法拉利，未試過被男仔車添，因為以前都係哥哥同爹哋車我。（想第時男友都要揸靚車接送？）唔一定，我想自己努力買我鍾意嘅車。」

自認「鞋癡」

香香自爆是「鞋癡」，又笑言想古仔送「鞋子」，她說：「我好鍾意儲鞋，屋企四個鞋櫃，超過五、六十對鞋，我細個試過畀女仔蝦，攞咗我對鞋，之後我就對鞋變得好重視，唔會掉棄，搬屋都搬埋。（叫古仔送鞋畀你？）好呀！我會好好保護。」

事事唔回應

古仔則說：「十年冇揸車，多數拍戲先揸，因為怕攰、怕塞車又冇揸車癮，去法國同加拿大就試過自駕遊。」多年來古仔在內地捐錢建了63間學校，被導演爾冬陞「踢爆」，問及此事時，古仔說：「唔回應。（想低調？）唔回應！」問到舊愛黃（金己）瑩日前現身佛教活動，古仔未聽完問題即說：「唔使問，唔回應。（佢信咗佛？保養得唔錯？仲有聯絡？）唔回應。」古仔透露母親節望抽空與家人吃飯，並讓古媽媽揀手袋作禮物。

文：影視組