呂慧儀變飯桶醫生叫停
大肚呂慧儀昨日在老公陪伴下出席劇集宣傳活動，上圍Big爆的她透露最近變飯桶每餐食兩碗飯，已增重十多磅！同場的李麗珍及李若彤等High爆向市民派孖裝雪條，對於被指「膠樣」，珍妹認曾打瘦面針，但拍劇前已停打。
女藝人李若彤、李麗珍、張慧儀、岑麗香及呂慧儀等昨日到荃灣宣傳新劇《女人俱樂部》，眾星與市民玩急口令派80年代盛行的孖條，飾演兩母女的珍妹及香香孖住出動晒溫馨。五位年輕M Club成員糖妹（黃山怡）、陳嘉寶、賴慰玲、吳燕安及陳瀅身穿校服，青春逼人！
懷孕近五個月的呂慧儀穿平底鞋與老公黃文迪到場，穿上鬆身衫的她仍難掩凸肚及Big爆上圍，她表示大肚後胃口大增變飯桶，已增磅十多磅，笑言想做米飯代言人：「每餐可以食兩碗飯，驚BB唔健康咋！我想自然分娩，醫生都叫我唔好食咁多嘢。」問到「蟹籽」是仔是女？她表示已照超聲波，但未確定，遲些由老公宣布。
李若彤暗戀老師
保養得宜的李麗珍被指打botox致「膠面」，她承認曾打瘦面針，但拍劇前已停打：「拍劇前都冇打，怕影響演出。（畀人話膠面！）咁係讚定彈先，我只係瘦面，其他都唔敢試，我顴骨夠高唔使搞，塊面太瘦反而憔悴，拍完劇都瘦咗十磅。」另有指因女兒反對她與潘源良結婚，導致與男友感情生變，珍妹表示感情生活一向平淡，是否跟女兒有關，她說：「係唔咁夾，佢依家反叛期。（結婚問佢意見？）傾吓囉！唔一定佢話晒事，但未有打算結婚。」
High爆的李若彤表示最近獲不少市民跟她分享劇情，姨甥女的幼兒班朋友都認出她，問到會否再拍劇？她說：「要有啱角色，我唔介意做人阿媽！個劇勾起我好多回憶，中二我暗戀老師，送咗張合照畀佢叫佢記得我，依家都未必咁大膽。」
文：影視組