鍾嘉欣做和事老 識做耍冧
鍾嘉欣昨日現身鬧市銅鑼灣，由於下雨的關係，一眾傳媒擠在帳篷下避雨，但竟被工作人員指「阻住嘉欣出場條路」，惹來記者鼓譟。嘉欣得悉後即叫記者「唔好嬲」並作出安撫，認真識做。
嘉欣昨午冒雨現身銅鑼灣街頭，出席宣傳活動，吸引大批粉絲到場支持，場面混亂。活動開始前，工作人員安排嘉欣到附近商場休息，到場採訪記者惟有逼在帳篷下避雨苦候，卻被工作人員指「阻住嘉欣出場條路」，要求記者散開，一度引起鼓譟，活動最終遲了約15分鐘才開始。嘉欣出場時即安撫傳媒並多次說：「唔好嬲」，之後賣口乖稱：「都知大家辛苦，為咗我日曬雨淋，要錫粉絲多啲。」期間她與現場圍觀者玩遊戲。
否認失百萬代言費
提到嘉欣未有與合作多年的修身廣告續約，對方更找來徐子珊以新代言人身份拍攝新一輯廣告，嘉欣對此表示：「我同廣告商一直合作愉快，如果唔係都唔會合作咗3年啦！不過換咗新宣傳方式，換人亦好正常啫。（廣告商事前有通知妳？）我經理人話畀我聽囉。」
子珊穿比堅尼拍廣告，結果換來雜誌上的標題意淫，嘉欣為子珊講盡好話：「我覺得啲相好靚，子珊好靚，只係字眼上反方向咗。（你都接受三點式上陣？使唔使問過男友？）健康性感冇問題，我身邊人都對我好有信心，唔會過問工作上嘅事，亦唔需要備案。（話你冇咗幾百萬代言費？）假嘅，作咋！對於依家自己擁有嘅一切，我好知足。」問她是否已有其他廣告或正在接洽新修身廣告？嘉欣甜笑似乎默認：「總之未落實嘅嘢唔講得。」
文：影視組