王曼喜為愛失job 無悔出櫃
王敏德與馬詩慧長女王曼喜（Kayla）早前勇敢「出櫃」，昨日她出席活動時坦言自承認同性戀後遭某些品牌取消原定工作，不過獲父母及弟妹支持的她，愛得無懼：「自己開心就得！」
昨日王曼喜與歌手薛凱琪（Fiona）、汪詩詩表妹湛琪清等出席周大福 X Central Saint Martins藝術珠寶展發布會，公開同志身份的Kayla單拖到場，未見母親馬詩慧，問她是否激嬲媽咪？她笑言：「點會嬲？都冇嘢，之前都試過幾次冇一齊出席活動。」至於會否擔心出櫃而影響接job？她坦承：「有時影響到，但自己開心就得。（有冇啲品牌活動之前傾好咗，但依家拒絕你？）有，但大家都有唔同價值觀，我尊重唔同決定，做好自己。」
愛男愛女未揀定
提到她在Instagram上載了一張寫着「I KISSED A GIRL AND I LIKED IT（我吻了一個女孩，我很喜歡）」的圖，獲爸爸王敏德留言「me too（我也是）」，Kayla稱父母都很支持她，但最初兩人知悉其性取向後，母親表現較為震驚，Kayla說：「因為佢都想抱孫，要慢慢適應，佢哋都戥我開心。（細佬妹都支持你？）妹妹係第一個知，佢哋都支持，之前同細佬一齊睇演唱會，聽到首歌叫《Same Love》（內容關於出櫃），細佬都好興奮。」她透露與女友Lia拍拖半年，問她是否不會再跟異性拍拖？她坦言：「我唔會講一定，我同過男仔拍拖，之後覺得自己偏向鍾意同女仔一齊。（Lia知唔知你可能同男仔一齊？）我哋兩個心態都好open。」
Fiona儲錢做「獨女」
Fiona以露背裝上陣，並即場設計頸鏈，她大讚品牌說：「啲珠寶係由設計系學生設計，我細個都畫咗好多衫、首飾嘅圖，但冇人幫我實現，所以覺得品牌好偉大。」她稱曾有人邀請她推出商品，但自問對錢及商業方面不太認識：「如果將來結婚，有另一半幫我理財，可以考慮做生意。（你做人太太，唔係你管財政？）我冇諗過要管老公財政，應該財政獨立。」她透露現正忙於錄音，公司為讓她專心錄音而推掉電影工作，問她會否感肉痛？她笑謂：「我媽咪就會肉痛，因為係佢管理我財政，佢會叫我出席多啲活動賺錢，因為佢擔心我啲性格咁強，唔鍾意靠人照顧，應該要儲定多啲錢。」
文：名人組