Yumiko瞓身賣衫千萬富婆送上門
千萬富婆鄭希怡（Yumiko）進軍時裝界！去年十一月「升呢」做少奶奶的Yumiko婚後短短半年，除享受靚太生活外，事業心勁重的她原來一直密謀殺入時裝界，首次開設時裝網店。Yumiko為「親生女」出錢又出力，除自掏過百萬投資外，又「瞓身」做model教襯衫，更揚言會考慮親自送貨上門以表誠意。
現年32歲的鄭希怡去年下嫁拍拖八年的化妝師梁學儲，雖然榮升人妻，但Yumiko不想養尊處優，反而仆心仆命籌備明天開業的網上時裝店，Yumiko昨日透過電話訪問就分享喜悅話：「自己幾年前都想開o架喇，只係工作忙，令計劃一推再推，呢半年婚後多咗時間，老公又好鼓勵我，所以決定的起心肝開網店。」
親自教人襯衫
原來，Yumiko曾考慮過開地舖，但因舖租太「乸脷」而改開網店，而該網店whysocool是與好友合夥，她投資了七位數字，另外亦聘有三位員工，均是老公梁學儲的化妝師老友。
Yumiko又透露用了三個月走遍台灣、泰國、日本及韓國「搵筍嘢」，每日更花十幾個鐘「芒」實電腦摷衫，笑言十足毒男生活。Yumiko又話：「網店今個月30日就會正式開張，已經有幾百件衫，到時仲會有開幕酬賓周，或親自送衫畀客人，依家心情真係好興奮，因為終於可以圓夢。」她又笑言為了「親生女」會「瞓身」力撐：「買衫唔一定要華貴，最緊要識襯，我賣幾百蚊一件衫都有，對象係16至86歲嘅靚女，我會自己做埋model影宣傳照，示範一件褸襯七套衫，話晒我都有50吋長腿同36E嘅大波身材（一笑），梗係要做生招牌啦！」
繼續歌唱事業
問到Yumiko會否棄影從商？她就拍晒心口話：「唔會！我之前聲帶生繭，做咗手術把聲清咗，嚟緊六月會錄音，希望八月出碟。」又表示先享受婚姻生活和做生意，也不理得造人計劃了。
如今成功誕下「親生女」，Yumiko不忘感謝老公幫手整電腦外，又話若果將來賣明星二手衫，都會搵好姊妹容祖兒、Twins攞衫，不過，Yumiko最感激是投資有道的謝霆鋒，她說：「霆鋒教我返內地搵錢，話內地有無限發展，當時我有啲抗拒，但之後拍完劇又做商演，終於有第一桶金。」
文：音樂組