曾志偉添丁賀高收
藝人曾志偉、李麗珍、李若彤、吳啟華等一眾新劇《女人俱樂部》的演員前晚相約食飯兼睇劇集首播，志偉揚言收視過40點請演員們環遊世界，又笑謂若收視好「唔止『添食』，要『添丁』添啦！」。
由曾志偉監製的劇集《女人俱樂部》於前晚播出第一集，志偉宴請一眾演員到尖沙咀打邊爐兼齊齊收看第一集，他表示對收視有期望，更許下請遊埠承諾：「收視40點環遊世界，35點去歐洲，30點去亞洲，28點去長洲啦！26點搵周公呀！（會添食？）環遊世界完，唔止添食，添丁添啦！」
李麗珍對於志偉表示如收視達40點就請客環遊世界，她說：「無講過喎！（着三點式慶祝？）到時先算啦！（志偉話收得好唔止添食要添丁？）哈哈，添丁唔介意！不過我等抱孫好過啦！」她表示囡囡已17歲，即使囡囡拍拖也不介意，最重要是溝通。吳啟華在劇中飾演怕女人的小男人，被問有沒有咀戲？他說：「喺後生版咀晒。（老婆唔畀？）唔關事，拍《再戰明天》都咀徐子珊三、四次。（好咀？）唇夠嘟，包住咁，都好咀。」
王敏奕否認靠關係
飾演李麗珍年輕版的王敏奕前晚未有現身，但日前被拍得與曾志偉兒子曾國祥街頭激吻，被指是靠男友的關係才獲得拍劇的機會，王敏奕經理人麥曦恩表示王敏奕不認識曾志偉，她說：「《女人俱樂部》試鏡當日只有監製同李麗珍在場，係覺得適合先畀機會，可能依家叫曾志偉認邊個係王敏奕，佢都認唔出，佢係光明正大得到個角色！」曾國祥昨日電話訪問時承認與王敏奕拍拖，但謂二人是在《女人俱樂部》的演員招募後才發展，力撐女友是憑自己的努力得到演出機會。被問到為何不公開戀情？他說：「唔係特登唔講，但怕公開會令人有錯覺！」
劇集《叛逃》大結局平均收視28點，最高30點，而周一首播的《女人俱樂部》平均收視25點，最高26點。
文：影視組