楊秀惠擲百萬「瞓身」創業
快將「女人30」的楊秀惠最近投資7位數字「血汗錢」開舖，代理意大利美容產品，由洽談產品代言人變身成老闆的她，近日新舖試業忙個不停，每日只睡3個鐘，秀惠笑言稍後更打算「瞓身」睇舖，認真搏命。
快將30歲的楊秀惠最近投資7位數字，在銅鑼灣開設樓上舖，升呢做老闆，秀惠舖頭代理意大利美容產品That'so近日正式試業，原來楊秀惠在馬來西亞的家人都經營不同生意，貪靚加上主持了年多無綫節目《姊妹淘》後，對美容生意興趣大增，去年機緣巧合下，由洽談代言人變開舖做老闆，她說：「本來去新加坡係傾做代言人，試過產品後，索性攞咗個代理權嚟做，但係自己未做過生意，佢哋當初都有啲質疑，後來花咗好多工夫、誠意，傾咗半年先傾得成。」
拍劇睇舖兩邊走
由年頭開始秀惠四出搵舖，接着忙裝修、入貨、布置及開設網頁等，事事皆親力親為忙個不停，加上無綫工作兩頭忙，每日只瞓兩三小時，但有了新目標反而愈忙愈起勁，現時看見舖頭試業感覺鬆一口氣。問到將拍新劇的秀惠，日後要兩邊兼顧豈不是更忙﹖她笑說：「咁做生意就一定辛苦要落手落腳，都有同公司講咗開舖，公司都好有人情味話會互相配合，遲啲會買將梳化床放係辦公室，拍劇收工就過嚟舖頭打點吓，同埋爭取時間休息。」
做生意要講良心
講到投資的7位數預計何時能回本﹖楊秀惠說：「自己第一次做生意，老竇話做生意最緊要有良心，產品自己同畀朋友試過都覺得好，「美白神器」同「爆炸瘦身mousse」幫到我美白同去水腫，回本遲啲再諗啦。」
文：影視組